WILLEMSTAD – Imponiendo balotashonnan atrasá serka pagadónan di impuesto e  fail di kobransa di servisio di impuesto a krese te un montante di kasi seis miar florin na debenan di impuesto i prima partí den 130.000 Number di identifikashon úniko na ofisina di impuesto.

E magnitut aki ta hasi imposibel pa kobra tur debe efektivo ku e kapasidat di kobransa. Pa e motibu ei servisio di impuesto ta pone prioridat na kobransa di debenan ku ta habrí.

Pa redusí e fail di kobransa na un nivel ku por dominá i duna servisio di impuesto den su totalidat e oportunidat pa bai traha den aktualidat, servisio di impuesto a implementá un adaptashon na e maneho di kobransa.

No ta bai kobra e balotashonnan di añanan 2017 i mas bieu mas aktivo. Espesífikamente esei no ta nifiká ku a kanselá e debenan ei, pero ku servisio di impuesto lo bai dirigí su kapasidat di kobransa riba balotashonan mas resien ku tin un chèns di kobransa mas haltu.

Riba e regla prinsipal aki tin tres eksepshon den e maneho di kobransa. Lo kobra balotashonnan di añanan 2017 òf mas bieu si resultá ku a imponé nan komo konsekuensia di un investigashon fiskal  hudisial, si e debe di impuesto di añanan 2017 òf mas bieu ta un mion florin òf mas haltu i servisio di impuesto tin informashon ku ta indiká ku lo por kobra esaki, òf si e debe di impuesto di 2017 òf mas bieu ta pagá kaba riba un kuenta blòkiá, manera serka un notario.

E kambio di maneho aki tin komo konsekuensia ku lo no trata kartanan di apelashon di añanan 2017 i mas bieu, a ménos si e pagadó di impuesto duna di konosé di tin interes den esaki. Di e manera aki e adaptashon di e maneho di kobransa ta duna un kontribushon tambe na redukshon di e gran kantidat di kartanan di apelashon.