WILLEMSTAD – Servisio di Impuesto di Kòrsou ta haña un ‘callcenter’, minister di Finansas ta informá riba medionan sosial. Segun e minister tin hopi pa mehorá riba tereno di strategia di kontakto ku kliente na Servisio di Impuesto.

Aña pasá a tene un ‘quickscan’ pa wak kua ta e mihó manera  pa yuda Servisio di Impuesto di Kòrsou pa sigui profeshonalisá e servisio. Banda di e tereno di teknologia digital, finansas, prosesonan di trabou, personal, gerente, kòntròl, responsabilisashon i transparensia a bini dilanti tambe ku Servisio di Impuesto di Kòrsou no tin un idea di e kalidat ku e ta ofresé.

No tin un strategia pa kontakto ku kliente

For di e rapòrt por dedusí ku riba tereno di kontakto ku kliente tambe tin hopi pa mehorá ainda. No tin niun departamentu dentro di Servisio di Impuesto ku ta responsabel pa brinda sosten na e pagadó di impuesto.

Naturalmente tin trahadónan di Inspekshon ku ta duna informashon na resepsion, pero e no ta integrá. Por ehèmpel no tin un programa pa duna guia kon ta kontestá na tempu i korekto telefonnan ku ta drenta i no ta generá informashon atministrativo tokante efektividat di kontestá telefon.

No tin ‘selfservice’

E benefisionan di ‘selfservice’ ta hopi pober, kompará ku normanan internashonal, asina ta menshoná den e rapòrt. E pagadó di impuesto no por habri i/òf mira su datonan di registrashon i impuesto na internèt. Tampoko no ta posibel pa transferí kambionan na internèt.

Tin un kantidat di preguntanan ku hendenan ta hasi hopi  tokante lei i proseduranan, pero ta parse ku no ta atendé nan òf aloménos no sufisientemente frekuente.

Tin un pakete limitá di informashon ku ta públikamente optenibel pa  e pagadó di impuesto. Esei ta konta sigur pa e parti digital di informashon ku ta disponibel i ku ta bai tokante kobransa i otro preguntanan ku bo por hasi komo pagadó di impuesto. Servisio di Impuesto tin un ‘website’, pero ku ta bai kasi solamente tokante kon ta kobra impuesto.

Establesé  un ‘callcenter’

Den koperashon ku Ernst & Young a start un proyekto awor pa mehorá e servisio na kliente na servisio di impuesto i e ‘callcenter’ lo ta forma parti di esaki. Segun minister di Finansas Javier Silvania e ‘callcenter’ lo bai krea tambe hopi kupo di trabou nobo.