WILLEMSTAD – Den un luna di tempu Servisio di Impuesto a prosesá 15.000 balotashon i a depositá 17.6 mion florin bèk riba kuenta di pagadónan di impuesto, asina mininsterio di Finansas ta informá.

Tin kasi dos mion florin reservá pa restituí, pero falta datonan di e pagadó di impuesto, manera kuenta di banko.

E parti ku si por a paga ta konsistí di pago bèk di impuesto di entrada, seguro di inkapasidat pa traha, seguro general pa gastunan di malesa eksepshonal i e seguro básiko di gastunan di malesa.

A deskontá  eventual debenan ku tabata habrí ainda di por ehèmpel impuesto di rekohe sushi, impuesto di bienes inmóvil i sobrá fondonan. Esei a monta na tur mas ku 15 mion florin.

Den e mésun periodo a imponé mas ku 12.000 balotashon ku un balor di algu mas ku 27 mion florin kaminda e pagadó di impuesto mester a paga aserka.