KRALENDIJK – SGB ta ofresé huntu ku FBSB, Jong Bonaire, SPAB, BBF, FFB, Stichting Jongeren en Toekomst met Braincafe i Swim Academy Splash, diferente aktividatnan (gratuito) despues di skol pa e aña skolár aki. Dia 2 di òktober, e bònt nan a formalisá e kolaborashon aki ku un akuerdo.

Den e aña eskolár 2023-2024, nos a kuminsá na Liseo Boneriano ku un programa di Highschool pa alumnonan di pabou. Después di kome un kuminda kayente, e alumnonan por hasi nan tarea den un ambiente trankil pa despues por tuma parti den aktividatnan. Nos ta traha serka huntu ku Jong Bonaire pa lográ esaki. Banda di esei, e talentonan selekshoná pa futbòl dor di federashon di futbòl, ta risibí entrenamentu adishonal.

“Pa e aña skolár aki, nos a ampliá e aktividatnan ku basketbòl, bèisbòl, sòftbòl, dansa, banda i breincafé. Alumnonan por partisipá gratuitamente den un aktividat di nan preferensia. Nos ta spera ku dor di eliminá e barera finansiero i desafío di transporte, mas hoben por partisipá i deskubrí nan pashon,” segun Pim Post, empleado di e ofisina di aktividatnan di SGB.

Un investigashon di Salú Públiko ta mustra ku salú mental di hubentut ta prekupante, kaminda 22% di nan ta eksperensia un sintimentu di soledat regularmente òf semper. Nos ta spera ku dor di forma parti di un grupo, nos por duna un kontribushon positivo pa eliminá esaki. Banda di ee bunita programa aki, nos ta ofresé lès di landamentu semanal pa alumnonan ku aínda no tin nan diploma di landamentu.