WILLEMSTAD – Miembro di koalishon pa PNP Sheldry Osepa ta pidi aklarashon di Promé Minister Pisas pa e situashon na Kas di Kòrsou. Segun e Minister Plenipotensiario anterior komportashon i maneho di e aktiual Minister Plenipotensiario na Den Haag, Carlos Manuel, ta laga hopi di deseá.

Sheldry Osepa, ku tambe a fungi komo minister plenipotensiario na Hulanda, a hasi 47 pregunta na Promé Minister. E parlamentario pa PNP ta bisa ku e ta disponé di informashon alarmante. Àmtenarnan mester soportá tentamentu, lokual ta sòru pa un ambiente di trabou insigur. Nan ta trahando den un kultura di miedu, represaya i opreshon, segun Osepa.

Entre otro Osepa ke un aklarashon kompleto di e deklarashonnan di Manuel tokante vigilansia ku kámara den Kas di Kòrsou, ku aparentemente t’ei pa motibu di problema ku bishitantenan agresivo. Osepa ta èksigí un bista general di insidentenan pa determiná si uso di kámara ta nesesario.

Un gran kantidat di pregunta ta tokante un supuesto éksodo di personal na Kas di Kòrsou. Hopi empleado lo ta na kas sin ta bai traha. Osepa ta menshoná kaso di seis hende ku a tuma retiro prematuro òf ta inkapasitá pa traha pa tempu largu òf a bai ku un kompensashon di retiro.