WILLEMSTAD – Speshalistanan médiko na Kòrsou ta bisa ku nan no ta traha pa un salario di 295.000 florin. Si esei sosodé tòg – si wes duna sentensia na bentaha di gobièrnu di Kòrsou – nan lo terminá nan relashon di trabou ku Curaçao Medisch Centrum (CMC). Esei tabata ayera un di e mensahenan  den e kaso di CMC kontra gobièrnu.

Kompromiso di e lucha hurídiko ta aplikashon di Normering Topinkomens, LNT, ku ta fiha un límite pa e salario ku funshonarionan den (semi-) gobièrnu ta pèrmití pa gana.

Abogadonan di CMC i e speshalistanan ku a uni den e kaso aki ta di opinion ku e LNT ta aplikabel solamente pa instanshanan di gobièrnu i no pa instanshanan partikular manera CMC. Ademas nan ta kuestioná e definishon di lei i ta bisa ku dòkternan speshalista no ta kai bou di e kategoria di ‘funshonarionan haltu’ manera deskribí den e lei nobo.

Aktualmente tin 49 dòkter speshalista ta traha den CMC. Pafó di CMC tin 19 dòkter mas, pero eseinan no ta kai bou di e LNT.

Prinsipio di igualdat 

Ademas e abogadonan di gobièrnu a mustra ku pa 30 di yüni e salario di speshalistanan médiko lo subi supstansial te 386.000 florin pa aña i eventualmente por sigui bai te 501.000 florin.

Esei no a impreshoná e médikonan. E djesnuebe speshalistanan pafó di CMC ta gana konsiderablemente mas, loke ta varia di 900.000 florin te 1,8 mion pa aña, dependiente di e tratamentunan adishonal ku nan ta ofresé. Na Klínika Capriles tambe tin dòkter speshalisá, pero e lei no ta aplikabel pa nan tampoko. “Por mira esaki komo un violashon di e prinsipio di igualdat den e kaso aki.”

Tambe e dòkternan sa ku despues ku un kolega finalisá su estudio na Hulanda e ta kuminsá ku un salario mínimo di 280.000 euro, ku despues di tres aña ta subi pa 360.000 euro i ta sigui subi.

“Na momentu ku apliká e LNT pa dòkternan di Kòrsou, ta rechazá nan solisitut i nan ta preferá pa keda Hulanda pa mas siguridat finansiero,” segun e hòspital.

E situashon aki pues tin konsekuensia pa kuido den CMC, e hòspital ta bisa. Dòkternan speshalista di pafó di Kòrsou lo no ke bini e isla pa motibu di e lei LNT. “Pa e motibu aki ta surgi listanan di espera mas largu i e kuido pa pashèntnan ta sufri retraso.”