WILLEMSTAD – Minister di Finansas Javier Silvania ta haña ku Parlamentu mester hasi lihé ku tratamentu i aseptashon di e Ordenansa di Lei tokante normanan di entradanan haltu.

Si nan no hasi esei, esei lo tin konsekuensia pa e penshonadónan di gobièrnu i empleadonan públiko i por lo pronto lo no por indeksá nan penshun òf salario.

Indeksashon di derechonan di penshun i e penshunnan di Fondo di Penshun General di Kòrsou, APC, ta reglá den artíkulo 30 di Lei di Ordenansa di Penshun di trahadónan di gobièrnu. Segun e artíkulo aki indeksashon di e penshun di APC ta mará na indeksashon di salarionan di ámtenarnan i na e posishon di kapital di APC.

Den e artíkulo ariba menshoná ta reglá ku, si i te kaminda e salario di e trahadónan di gobièrnu mediante adaptashon di e salarionan na e kosto di bida a konosé un kambio, e penshunnan (temporal) por lo tanto mester subi. E oumento aki ta tuma lugá 1 di yanüari di e aña kalendario ku e adaptashon konserní.

Indeksashon di penshun di APC ta vinkulá na indeksashon di salarionan di àmtenarnan. Konforme palabrashonnan hasí den Konseho di Minister di Reino (MMR) , for di 2020, antisipando riba dia ku e Ordenansa di Lei di normanan di entradanan haltu ta drenta na vigor, a kòrta den e salario di kolaboradónan den e sektor (semi)públiko ku 12,5%. Pa garantisá e redukshon di 12,5% a fris entre otro e indeksashon di e salarionan di e kolaboradónan den e sektor (semi)públiko.

Den Konseho di Minister di Reino di 24 di yüni 2022 a disidí ku ta pèrmití Kòrsou pa eliminá progresivo e redukshon di 12.5% ariba menshoná bou di kondishonnan. Un di e kondishonnan ta ku eliminashon por tuma lugá solamente  despues ku na Kòrsou a stipulá e Ordenansa di Lei di normanan di entradanan tòp konforme desishonnan di RMR i ku esaki lo drenta na vigor den un término mas kòrtiku posibel.

Pasobra e frismentu di e indeksashon ta forma parti di redukshon di 12,5%, e Ordenansa di Lei di normanan di entradanan haltu mester drenta na vigor pa asina por indeksá atrobe e salarionan di e kolaboradónan den e sektor (semi)públiko. E ora ei numa, konforme artíkulo 30 di e Ordenansa di Lei di penshun di funshonarionan públiko, por indeksá e penshunnan di APC atrobe.

Awor ta warda riba Parlamentu, segun minister Silvania. Ademas un ke otro ta dependé tambe di e kapital di APC si un oumento ta posibel. Maneho di APC por skohe pa laga e oumento keda parsialmente òf kompletamente afó. E punto di salida ta ku e nivel di kobertura, despues di e indeksashon, no ta mas abou ku 105% pa e indeksashon parsial, i no ménos ku 115% pa e indeksashon kompleto. Ku un índise di kobertura di mas ku 105% te ku 115% por konsiderá un indeksashon parsial. Ku un índisé di kobertura mas haltu ku 115% por konsiderá un indeksashon di 100%.