WILLEMSTAD – Den kuadro di e situashon alarmante rondó di diabétis na Kòrsou, Laboratotio de Medicos (LABdeMED) ta organisá e aña aki un siman di diabétis speshal den luna di mei. E siman lo ta den kuadro di prevenshon i oumento di e nivel di kuido pa pashèntnan diabétiko. E akshon ta kana dilanti riba Dia Internashonal di Diabétis ku lo tuma lugá riba 14 di novèmber 2023.

Ta importante pa pone atenshon riba konsientisashon i edukashon na momentu ku bo tin mas ku mitar di poblashon ku ta sufri di un òf mas malesa króniko manera problema ku kurason, sobrepeso i diabétis. P’esei LABdeMED ta invertí regularmente den aktividatnan ku ta informá i eduká pueblo. 

Durante e siman di diabétis ta organisá diferente seshon edukativo i akreditá pa profeshonalnan den  kuido. Un simposio tokante e koperashon nesesario entre kuido primario i kuido sekundario lo ta parti di e programa. Ademas lo tin seshonnan kulinario speshal pa pashènt- i otro interesadonan. Den e ‘Culinary Medicine Experience’ dòkternan di kas i partisipantenan ta siña kon nan mes por drecha platonan delisioso i salú ku ingredientenan lokal.

Ta remarkabel ku pashèntnan diabétiko no ta risibí tur ora e kuido korekto, lokual ta hopi biaha debí na falta di konosementu. Esaki por trese konsekuensianan serio pa salú i ta pone mas preshon riba kuido lokal. LABdeMED ta enfatisá e importansha di prevenshon i pa duna kuido lokal avansá pa pashèntnan ku kondishonnan króniko manera diabétis. Sosten na profeshonalnan den kuido ta para aki sentral.

E siman di diabétis aki ta un stap importante pa pone mas atenshon na e situashon lokal di e malesa króniko di diabétis. Personanan ku ta interesá pa risibí mas informashon di e siman di diabétis aki òf di servisionan pa pashèntnan diabétiko por tuma kontanto ku LABdeMED.