WILEMSTAD – E movimentu di siudadano Venex Curaçao i  Union Pan-Amerikano i Karibense pa Derechonan Humano, Pachur, ta debatí djaweps benidero tokante ideanan pa laga migrantenan partisipá komo motor di desaroyo. E simposio “Migrante komo motor di desaroyo” ta tuma lugá na World Trade Center na Willemstad.

Segun e organisadónan e simposio ta ofresé informashon balioso i aktual tokante diferente sorto di migrashon, e kousa- i konsekuensianan, i formamentu di maneho i strategia.

Den e pènel tin kuater eksperto:  Julio Croci di Internationale Organisatie voor Migratie (IOM), Jeannette Juliet Pablo, presidente di Unidat di Bario Korsou, sosiólogo Gerardo González Machado i sekretario-general di Pacuhr, José Antonio Oropeza.

E meta di e enkuentro ta pa interkambiá eksperensia i promové kontaktonan profeshonal i personal, pero tambe pa desaroyá ideanan i solushonnan inovativo pa atende ku retonan ku ta konserní migrashon i eksplorá posibilidatnan di desaroyo.

Segun e organisashon di refugiadonan di Nashonannan Uní, UNHCR, tin mas ku shete mion refugiado- i migrantenan di Venezuela rònt mundu, komo konsekuensia di e situashon di emergensia humanitario kompleho ku ta asotá e pais di Sur-Amérika. Aproksimadamente 14.000 di e refugiado- i migrantenan aki ta na Kòrsou, loke ta representá práktikamene 10% di e poblashon di e isla.