Skibí pa Norwin Willem

E mayoria di trahadónan di e promé instituto pa akohida di mucha despues di skol  a uni i a afiliá na sindikato SIMABO. Den un forma ordená i disipliná e gran mayoria di e trahadónan riba invitashon di e sindikato dia 1 di òktober a bai kas Sindikal AFBW i a inskribí nan mes komo  miembro di e sindikato SIMABO. E akshon sindikal aki a dura un ora i mei i no a perhudiká den ningun forma e proseso na e instituto, ya ku di 9’or di mainta pa 12.30 no tin ningun mucha na e instituto i ku e trahadónan ta usa e orario ei pa hasi nan preparashonan di dia en espera di yegada di e muchanan despues di ora di skol. Sindikalismo a konstatá ku komunidat, esta gobièrno ainda no ta balorá sufisiente e trabou importante ku a enkargá e trahadónan aki kuné durante siman pa kuida, eduká i entretené sanamente yunan di hende durante 4 ora sigur tur dia di siman. Mirando e echo ku mama i papa ta traha, de fakto tin ku traha pa asina por kubri nan gastunan mensual, edukashon di nan yunan ta keda entregá den man di trahadónan ku tin ku karga un responsabilidat grandi. I ta realmente pa sindikalismo inkomprensibel i hasta un bèrguensa ku e kondishonnan di trabou di e trahadónan aki ta limitá solamente na pago di un salario i no tin ningun otro kondishonnan laboral sekundario pa rekompensá nan trabou balioso. Asina nos por a tuma nota ku e trahadónan aki no tin kompensashon di fakansi, nan no konosé bonus di fin di aña, nan no tin un sistema di penshun i asina por konstatá ku nan kondishonnan laboral pa sindikalismo en todo kaso den aña 2024 ta inakseptabel. Sigur si kompará esaki ku e mesun trahadónan den e sektor di akohida di mucha na Ulanda. Sindikalismo no a skohe pa e struktura di Laso Direkto, kual a enserá inkorporashon di Boneiru den konstitushon ulandes. I den e konstitushon ei artikulo 1 ta papia palabra kla i ku no tin espasio pa mal interpretashon. Tur hende ta igual pa lei i no por keda deskriminá a base di nada. Pues igualdat òf si bo ke ekivalensia (artikulo 132 a di e mesun konstitushon) te preskribi ku kasonan igual mester ser tratá igual. E diferensha por eksistí basá solamente riba sirkumstansianan ku no ta igual. 

Entre tantu SIMABO a pone mediadó na altura di e afiliashon di e mayoria di e trahadónan na e sindikato i tambe e direktor di e instituto a hiba un kònbersashon habrí ku presidente di SIMABO i konsehero di USIBO i bokalmente a konfirmá ku e lo rekonosé e sindikato komo e representante legal di e trahadónan na su instituto. E rekonosementu aki lo keda ofishalisá den un asina yamá “konvenio di rekonosimentu” presentá pa mediadó i  ku lo mester keda firmá ofishalmente ku e mediadó komo testigu. Tambe mester bisa ku djasabra 5 di òktober e trahadónan a sera konosí ku e resto di e direktiva di SIMABO i a risibí informashonnan kompleto, pero tambe instrukshonnan kla ku desde awor padilanti tur loke ku tin di haber ku kondishonnan laboral ta SIMABO lo atendé esakinan huntu ku gerensia di e instituto. A mustra nan tambe pues pa no firma ningun  dokumento presentá na nan sin ku promé nan a tuma konseho serka nan sindikato. Awor e sindikato lo bai sinta na mesa pa asina inventarisá i bini ku proposishonnan realístiko pa mehorá e kondishonnan laboral di e sektor aki. I den esaki ta bai tin konsulta estrecho ku Entidat Públiko Boneiru i ministerionan. E meta lo mester ta pa tur trahadó den e sektor di akohida pa mucha, sea krèsh, esta di 0 te ku 4 aña òf akohida despues di ora di skol uni nan mes den un sindikato pa asina yega na un CAO pa e sektor aki kompleto. Nos kier felisitá e trahadónan di e instituto aki pa nan kurashi, nan balentia i ku nan a suprasá e maldito sombra di miedo i ta un ehèmpel pa nan koleganan den tur e otro institutonan pa sigui nan paso. I ta manera a splika nan ku si bo a disidí ku tur djadumingo bo ta bai duna honor i rèspet na Kreador, afiliando bo mes na un Iglesia. Meskos ku kada kuater aña bo ta duna bo sosten na un partido polítiko pa goberná nos isla. Meskos ku bo ta liber pa afiliá na kualkier organisashon deportivo i/o kulutral, bo afiliashon na un sindikato ta bo derecho sagrado i tur hende mester respetá esaki…punto. i na e dunadó di trabou sindikalismo kier bisa esaki: Un sindikato den bo empresa tin un balor agregá grandi pa un desaroyo sano i un kulttura di trabou saludabel. Sindikato no ta bo kontrinkante, sino bo partner den e empresa. I sindikato tin tur interes pa bo empresa bai bon pasobra kontinuidat di eksistensia di bo empresa ta garantia di trabou pa e trahadónan. I trabou ta produsí entrada pa kria nan mes i nan famia i asina alsa kalidat di bida di nos tur riba e dushi baranka aki.