Sindikalismo ta hopi preokupá pa e echo ku di parti di gobièrnu lokal no ta nota esfuersonanan tangibel i konkreto pa yuda tene e gastunan kolektivo manehabel. Esaki ta pone ku poko poko pero sigur tur e esfuersonan ku tur gremio rwybi den Diálogo Sentral a hasi durante años pa kibra e kadena di pobresa i pa yega na un sueldo minimo akseptabel i hustu lo por bai pèrdí. Pa por a yega na un minimo sosial i konbiná ku esaki na un peshun di behes i un sueldo minimo na drechi, investigashonnan a keda hasi i e siguiente gastunan ku tur luna ta ripití a keda analisá. Nan ta gastunan di vivienda – transporte riba i entre e islanan – energia, awa i telecom, kuminda i akohida di mucha. Pa loke ta trata vivienda gobièrnu Ulandes a akordá un areglo di suspsidio pa kasnan di Fundashon Cas Boneriano i un proyekto piloto ku e mesun supsidio pa kasnan partikular. Pero debí na preisnan haltu di hür den sektor privá i pa falta di kasnan sosial, e gastunan aki ta pisa enorme riba e sektor ku entrada abou den nos komunidat. Den e akuerdo di Kralendijk a keda palabrá ku gobièrnu di Boneiru huntu ku gobièrnu Ulandes lo a ekspandé e areglo di supsidio aki riba henter e merkado, miéntras ku mester a yega na konstruí kasnan pagabel den sektor privá. E nesesidat aki ta hopi grandi.

Riba tereno di transporte nos ta konstatá ku e sektor ku entrada abou mester fia sèn pa kumpra outo sea segunda mano òf nobo. I tur hende ta eksperenshá ku e interesnan na nos bankonan ta relativamernte haltu i pa falta di un bon infrastruktura, entre otro falta di kaminda adekuá pa kore baiskel nos ta tuma nota ku hende ku entrada abou tòg tin outo nobo pará dilanti di nan kas. Simplemente nan no por otro. Riba e tereno aki tambe tin un akuerdo ku Entidat Públiko lo a kuminsá ku entrodusí transporte publiko. Fuera di skucha ku tin fondonan pone disponibel i ku a papia ku kompanianan di transporte publiko na Uanda, ainda aki na Boneiru mes nos no por mira ku algu ta tumando lugá.

Pa loke ta koriente, awa i internèt tin un supsidio ta kore di parti di Ulanda sigur te ku fin di e aña aki. Kiko lo bai sosode den 2026 ainda no ta konosí. Loke si nos ta haña ta señalnan ku pa pueblo pone energia alternativa no ta atraktivo pasobra e loke WEB ta paga pa kumpra e loke e persona ta produsí di mas ta leu for di ta atraktivo. I pa loke ta internèt a pasa un lei ku a habri e merkado ku e speransa ku e preis lo bira mas barata. Mirando e merkado chikí den kua tur e kompanianan tin ku bai operá, sindikalismo tin su dudanan ku lo logra baha e gastunan di internèt aki na Boneiru.

Pa loke ta akohida di mucha por bisa ku a logra baha e gasunan konsiderabel ku un supsidio ku e institutonan ta risibí banda di e kontribushon di mayornan. Sinembargo sindikalismo a konstatá ku e suspsidio ei no ta yega pa kubri e kondishonnan básiko pa esnan ku ta laborá den e sektor ei. Sindikalismo ya a duna di konosé ku e kier sinta i dialogá ku e partnernan riba e sektor aki ku nos ta konsiderá ku mester bira parti integral di nos sistema di enseñansa.

Finalmente e loke mas ta molestiá henter komunidat ta e oumento di preisnan pa komestibel sin ningun klase di kòntròl i ku nos gobièrnu no ta atendé ku e seriedat nesesario. Sindikalismo ta kere den merkado liber, pero pa loke ta e produktonan di makutu básiko sindikalismo ta di opinion ku gobièrnu por i mester stipulá un máksimo na ganashi i tene kòntròl riba esaki. Mas aleu si nos mira e fondonan ku gobièrnu ta pone disponibel pa promové produkshon di propio kuminda den e sektor agropeskario, esta den e sektor di krio di bestia, plantashon i peskeria e no ta duna muestra ku gobièrnu kier atendé e sektor aki ku e seriedat nesesario.

Mirando e desaroyo aki, sigur sindikalismo organisá den USIBO ta leu for di ta kontentu i satisfecho kon gobièrnu lokal ta asumí su responsabilidat manera esaki a keda akordá den e Akuerdo di Kralendijk.

Usa lemanan polítiko entre otro ku lo hiba un maneho di tal forma ku kada habitante di Boneiru lo sobra 30% di su entrada despues di a paga su gastunan básiko ta zona simpátiko, pero si no goberná pa alkansá e metanan aki, por konsiderá e lemanan aki komo aktonan populista sin kontendio. Si no entrodusí e maneho di supsidio general, si no bin mas lihé ku ta posibel ku transporte públiko i si no bin un maneho di preis pa loke ta makutu básiko, realmente lo no dura muchu ku nos lo bolbe kai den e sirkulo di pobresa riba nos isla. Antó lamentabel ta ku den tur rapòrt ta keda publiká ku Boneiru ta pasando den un desaroyo ekonómiko positivo, pero ku e pueblo den su mayoria no ta partisipá den e benefisionan aki.