Otro logro di éksito di UNION TA HASI FORSA. Trahadónan di Zorg Werk Groep den un union harmonioso i di solidaridat a afiliá nan mes na e sindikato AFBW i despues di negosashonnan ku rèspèt pa otro, partidonan a koroná esaki ku firmamentu djabièrnè último di un CAO ku durashon te ku 31 di dézèmber 2025.

Un CAO manera e direktora di Zorg Werk Groep a trese dilanti ku benefisionan positivo pa e trahadónan. Tantu pa loke ta e kondishonnan primario esta un skal di salario transparente, kaminda kada trahadó sa i por mira na unda e ta drenta, pero alabes e ta mira kon e por krese vertikalmente den e skal ei, kaminda tin 16 tret di trapi pa e subi basá riba su prestashon anual. Pero alabes e ta mira kon e por desaroyá horizontalmente, esta ku e por haña promoshon i krese den su funshon, basta e hasi esfuerso i sakrifisionan personal i sigui studia den su ramo di trabou. Pues un persona por drenta servisio komo hasidó di limpiesa i terminá komo direktora di e instituto. Tambe mustra riba e benefisionan sekundario posirivo i modèrno ku e CAO ta brinda. Ku afiliashon di Zorg Werk Groep esaski ta bira e di tres instituto na Boneiru, banda di Fundashon Mariadal i Mental Helath Care ku ta kai bou di e CAO kolektivo den sektor di kuido na Boneiru, Saba i Statia. Pendiente na Boneiru ainda tin Trahadónan ku ta traha na dòkternan di kas i trahadónan di Krusada. Pabien na AFBW, pabien na Direktorado di Zorg WerkGroep i hopi pabien na e trahadónan aki.

E UNION, e Solidaridat, e lealtat na e kousa di e trahadó i su famia ta garantia 100% di ku trahadónan ta risibí e trato ku rèspèt, ku trahadó ta haña rekonosementu i ku nan ta haña un pago hustu pa e labor ku nan ta duna diariamente na e dunadó di trabou. E ta e garantia tambe pa logra kondishonnan sekundario, manera dianan di vakashon, vakantietoelage, bonus di Pasku, bon areglo di penshun i un kantidat di areglonan laboral pero tambe sosial faborabel. Ta e úniko forma pa nos por kombatí abuso i eksplotashon di e klase trahadó i protehá e trahadó kontra di dunadónan di trabou di mala fe. P’esei sindikalismo ta desaprobá aktitut di trahadónan ku ta laga nan mes ser usá i kumprá pa dunadónan di trabou i ta traishoná nan kompañero(a)nan ku ta sali na nan defensa i hasta pèrdè nan trabou pa e bon kousa. Kon e trahadónan aki ku ta biba bou di e spiritu di miedu por dil ku nan konsenshi ora ku nan bira lomba pa e lucha i laga nan kompañero(a) na kaya i pará su so. Ki kontesta nan lo tin ora puntra nan dikon te awe abo no a bira miembro di sindikato, miéntras esunnan ku a kana dilanti a haña waarschuwing, otronan a haña retiro òf no a alargá nan kontrakt, pasobra nan a kana dilanti pa defendé i buska bo derecho komo trahadó, pero bo mes a traishoná i desfroudá nan dor di no uni bo mes. Kon bo lo sintibo ora bo realisá ku abo ta un ku ta yuda mantené e situashonnan di abuso i eksplotashon di trahadó pasobra abo no a uni bo mes ku e otronan pa bira miembro di un sindikato i asina den union por tin muchu mas forsa pa hiba e lucha. Solamente por spera ku bo konsenshi e siman aki lo remordebo asina fuerte ku lo bo tuma e kurashi, ku lo bo kibra ku e spiritu di miedu i kobardia i ku orguyo i kara na laira bo afiliá bo mes na e sindikato ku tin representashon den bo kompania. Ta e ora ei so bo por tuma e benefisionan ku e otronan a logra ku lucha i sakrifisio ku un konsenshi limpi. Bo mester komprondé ku no ta husto pa abo bai kobra tur e benefisionan ku otronan a logra sin ku sikiera bo ta miembro di e sindikato ku a hiba e lucha. UNION, SOLIDARIDAT I LEALTAT na e kousa obreril ta e spada i eskudo di protekshon di e klase trahadó i su famia.