Sindikalismo kier bati bèl di preokupashon pa loke ta trata aktividatnan ekonómiko riba nos isla i relashoná ku esei e desaroyonan no  positivo riba merkado laboral. No tin sifranan ofishal ainda di parti di ofisina sentral di statistik, pero loke si ta bisto riba nos isla ta ku aktividatnan ekonómiko den sektor di konstrukshon i tambe pa loke ta invershonnan di gobièrnu den infrastruktura ta hopi abou i hasta por bisa malu. Den sindikalismo nos ta opservá esaki di e siguiente maneranan.

1. Kompanianan ku nan CAO ta terminá e aña aki ta pidiendo alargashon di e kontrakto ku e motivashon ku nan kompania no tin trabou i komo konsekuensia di esei nan entrada a baha di tal forma ku e ta afektando nan operashon normal.
2. Trahadónan mes ta aserkando sindikato ku e mesun notisia, esta ku nan tin lunas pará ketu, ya ku sea pèrmitnan no ta sali òf ta tardando den departamentunan di gobièrnu i/o gobièrnu no ta saka proyektonan mas di infrastruktura, esta di di drecha, rehabilitá o konstrui kamindanan nobo.
3. Pèrmitnan pa tereno, pero tambe pèrmitnan pa konstrukshon tin stagnashon supstanshal.
4. Sierto kompanianan a kuminsá baha trahadónan ku ta riba kontrakto pasobra simplemente no tin trabou pa mantene nan na trabou.
5. Trahadónan ta preokupá pa motibu ku nan ta bai drenta un aña nobo hopi insigur pa nan mes i nan famia. Esnan ku ainda ta na trabou ta preokupá pa e situashon insigur.
6. For di e sektornan empresarial mes nos ta risibiendo señalnan ku ekonomia ta stanká.

Riba tur esakinan tin tambe ku kosto di bida ta inkontrolabel i preisnan ta subiendo den un forma ku e peso di bida ta birando atrobe insoportabel. E forma agresivo ku belasten ta kobrando tambe ta kreando tenshon. Ademas nos ta skuchando menasanan serio ku gobièrnu ulandes tin intenshon di eliminá supsidionan ku ela bin ta duna den kuadro di yuda kombatí pobresa. Nos no por premirá e efektonan ainda den sifras, pero sigur ta ku esaki lo bai na afektá e kosto di bida desproporshonal, sigur pa loke ta trata preis di awa i koriente. Apesar ku ta desmentí esaki, mas i mas ta yega informashon serka sindikalismo ku e relashon Kralendijk Den Haag no ta di kanta makamba i ku Den Haag a tuma un posishon no pro-aktivo mas, ya ku e señal ku ta bin for di Kralendijk ta ku nan no ta deseá mucho metementu di Den Haag den nos asuntunan interno. Sindikalismo no ta drenta den e arena polítiko, pero kier rekomendá si nos representantenan den politika pa bai profundisá nan mes mas bon den e relashon estatal ku nan, esta nos politikonan a apoyá nos pueblo pa skohe na 2004 i ku nan mes atrobe no a respetá e resultado di referèndum di 2015 i na 2017 a bai di akuerdo pa ankra Boneiru den konstitushon Ulandes komo Entidat Públiko i ku esei Boneiru no tin e status di ta outónomo den Reino mas. Tambe ta bon pa nan realisá ku e derecho sagrado di outodeterminashon ta di pueblo i no ta un ko’i hunga di politikonan. Boso trabou ta pa logra lo máksimo dentro di e loke pueblo a skohe i si esei ta nifiká ku kaminda nos no por, esta nos no tin e fondo, ni e personal ni e konosementu, boso deber ta pa buska esaki primeramente serka Ulanda, ku ta karga e responsabilidat final di gobernashon di nos isla. Diplomasia ta e yabi i no hunga sabí i sigur no bai midi forsa riba kosnan ku bo sa ku adelantá lo bo sali pèrdí i pió ainda kaminda a sabiendas bo ta perhudiká henter un pueblo. Goberná pa sirbi mester ta e lema, guia i kòmpas.