Siman pasá den e kolumna aki mi a pronostiká ku 2025 lo trese retonan ferfelo kuné pa e klase trahadó i komo tal sindikalismo na Boneiru mester ta alerta. E reto ku mi a papia di dje tabata e reseso den nos ekonomia. Mi a ilustrá esaki ku entre otro stagnashon den e sektor di konstrukshon, pero tambe pa falta di invershonnan di parti di gobièrbu den nos infrastruktura. No mester lubidá tampoko e menasanan serio ku henter mundo ta konfrontando relashoná ku guera na Oekraina, guera na Libanon i Gaza, e insertidumbre di posishon di Merka awor ku Donald Trump a keda eligí komo presidente pa Estados Unidos.

E influensha mundial aki riba nos ekonomia ta bisto den desaroyo di preisnan i e inflashon ku ta dal nos. Esaki debí na e dependensha grandi di nos pa ku tur kos ku nos mester importá. Den siman tras di lomba nos por a lesa i skucha atraves di medianan sosial ku na Ulanda a i lo tuma sierto medidanan pa 2025 ku lo dal esnan mas vulnerabel den nos komunidat hopi duru i ku lo rebahá e forsa di kompra supstanshal kibrando asina tur e esfuersonan i logronan di e último añanan. Pa duna un mihó bista kiko nos ta papiando di dje, ata e ehèmpel aki. Te ku awor aki e sueldo minimo pa un solo persona ta Usd. 1750 pa luna, miéntras ku e tabata risibí un supsidio pa gastu di koriente di 1300 dòlar pa aña ku ta Usd. 108 dòlar pa luna. Pues por bisa ku su entrada tabata di Usd. 1858 pa luna. Banda di esei e persona tabata risibi un supsidio di Usd. 57 pa tarifa fiho di awa, koriente i internèt. Ku e medidanan anunsiá e persona aki ta bai sinti falta di Usd. 165, kual ta Usd 108 mas Usd 57 pa luna ku e lo tin ku bai paga for di su propio saku. Ta bin aserka ku ku si no pasa e lei ku ta mará sueldo minimo na e suma anual riba kua bo no tin u paga belasten, esta e asina yamá belastingvrije som, ta ser kalkulá ku e persona aki lo mester bai paga Usd.8 pa luna na belasten. Pues en total e persona aki lo bai atras ku Usd. 173 pa luna. Bo no mester ta un dokter den finansas pa realisá kiko esaki ta nifiká konbiná lu preisnan haltu pa kumkinda, transporte públiko ku no t”ei ainda, hürnan di kas skyhigh pa motibu di fakta di bibienda pagabel.

E situashon aki no mester ta akseptabel, sigur no pa e tres partnernan den Diálogo Sentral ku a traha asina duru riba e Akuerdo di Kralendijk kual a mehorá un tiki e forsa di kompra i kuné e kalidat di bida di nos hendenan mas vulnerabel. Tampoko e situashon aki por ta akseptabel pa komishon Thode ku huntu ku NIBUD a traha duru pa por a produsí sifranan real ku a kondusí na mehorashon. Miembronan di Eerste i Tweede Kamer, Defensor di Pueblo, nos koleganan di FNV, Kolegio di Derechonan Humano, Green Peace, UNKOBON no por keda ketu i mester laga nan bos resoná. I henter pueblo boneriano, sigur penshonadonan ku a sostené USIBO den e manifestashon grandi di dia 12 di mei 2023 mester ta alerta i kuminsá mobilisá. Nos prinsipio di DESKRIMINASHON NO ta bolbe haña forsa, ora ku si kompará nos den Caribe ku nos kompatriotanan den Oropa, nos ta mira ku na Oropa si forsa di kompra ta bai dilanti i ku aki den Caribe pa motibu di intervenshon di gobièrnu Ulandes ta bolbe hinka nos pueblo den pobresa. USIBO mester trese tur partido huntu den forma di urgensia e siman aki mes i pa asina fiha un posishon komun di henter Boneiru, Demonstrá patriotismo i lanta para pa nos derechonan ku nos a lucha huntu asina duru pe. Nos tin tur argumentu na nos fabor pa bolbe demonstrá ku e posishon ku Ulanda su gobièrnu ta tumando ante nos komunidat ta totamente robes i ku mester korigí esaki i no laga e pasa pasobra nos mes ta neglishá i drumi. Nos a demonstrá kaba ku nos por, awor ta mas fuerte so nos por bira pasobra hustisia ta na nos banda, Ban uni Forsa i laga bienestar di nos pueblo ta nos úniko kompas i guia, nada otro