KRALENDIJK- Djamars 5 di òktober último a sali pa Europa Sion Janga komo úniko representante di área di Caribe pa partisipá na European Youth Event na Strasbourg Fransia. Un evento kaminda hóbennan di rònt Europa i mundu ta bini huntu.

Riba inisiativa di Samira Raphaela (D66), Janga a haña invitashon komo representante di BITlab pa partisipá na e evento di European Youth Event (EYE), kaminda hóbennan ta bini huntu pa interkambiá ideanan. EYE tin komo meta: stimulá partisipashon aktivo di e siudadano bou di hóbennan Europeo. Den e evento di EYE míles di hóben di 16 pa 30 aña ta bini huntu pa interkambiá ku esunnan ku ta responsabel pa maneho i otro personahenan di influensia riba temanan manera e.o. durabilidat, igualdat i inklusividat. E aktividat aki ta tuma lugá fin di siman aki dia 8 i 9 di òktober na Strasbourg na Fransia.

BITlab

BITlab ta un organisashon di hóbennan di nos islanan ku ta studia òf a kaba di studia ku ta riba nos islanan òf den eksterior. E hóbennan aki ta boga pa partisipashon den maneho i buska solushonnan pa problemanan di nos komunidat. Nan ta atendé ku diferente áreanan riba kua nan a studia i profundisá nan mes.