KRALENDIJK- Den último simannan por nota un skarsedat enorme di stul riba e ruta entra partikularmente Kòrsou i Boneiru. 

Paseheronan ku ke bula di Kòrsou pa Boneiru tin ku warda te dia 11 di ougùstùs pa por haña un stul riba buelo di EZ Air i asta te ku 18 di ougùstùs pa por haña un lugá ku Divi Divi. Ounke ku normalmente e dos kompanianan aki tin sufisiente stul optenibel, esaki sigur no ta e kaso den periodo di fakansi grandi. Niun komersiante por permití su mes di warda 2 pa 3 siman pa por biaha pa un isla ruman, òf pa bin bèk for di esaki.

Pasahero ku ta dependé riba buelonan ku ta sali for di òf yega for di eksterior na Kòrsou tambe tin problema grandi aktualmente. 

Aunke hopi hende ta kere ku aerolineanan por djis hinka buelonan èkstra aden, esaki no ta asina fásil, ya ku nan ta wòrdu konfrontá ku reto ámbos kaminda ta trata sufisiente ekipo, pero tambe e disponibilidat di sufisente pilot. 

Responsabilidat

Mester bisa ku lástimamente gobièrno hulandes, nunka no ker a asumí responsabilidat pa e komunikashon aereo entre nos islanan. Rapòrtnan di e kompania di konsùltent SEO i tambe komishon Hartman a konsehá gobièrnu di Hulanda pa implementá un sistema di asina yamá Public Service Obligation (PSO), kamindat ta yega na akuerdo ku aerolineanan tokante a kantidat di stuk ku nan ta ofresé den un merkado i tambe tokante kua prèis. 

Kontrali na e situashon entre e islanan franses den karibe, kaminda sí a yega na PSO, gobièrnu di hulanda pa años kaba ta birando atras pa atende ku e asunto di transport aereo i ta preferá pa laga esaki kompletamente na kompaniana privá manera Divi Divi i EZ Air.