ORANJESTAD –  E grupo mas grandi di bishitante ku a bini Aruba entre luna di yanüari i luna di mart tabatin entre sinkuenta i setenta aña di edat i esei tabata kasi kuarenta porshento. Unu di kada tres bishitante tabata entre trinta i kuarenta aña. Asina e organisashon di turista di Aruba ATA ta informá.

Den e promé tres lunanan di e aña aki mas ku 305.000 turista a bishitá Aruba pa dos dia òf mas. Segun ATA esei ta hopi mas mihó ku den e aña promé ku corona na 2019 i e ta asta kuater porshento mas.

Tres kuart di e bishitantenan ku a keda drumi a bini di Estados Unido. Kasi mitar ta di e estadonan New York, Massachusetts i New Jersey.

Mas ku un riba sinku Merikano a bini ku American Airlines òf Jetblue. Kasi djessinku porshento a bini ku Delta Airlines.

E promedio di estadia di bishitantenan di Nort-Amérika tabata 7,5 anochi, nèt algu mas largu ku na 2019, ounke e diferensia no ta mashá. E promedio di estadia di bishitantenan di Europa tabata djesun anochi méskos ku na 2019. E promedio di estadia di bishitantenan di Amérika Latino tabata shete anochi.

Den e promé kuartal mas ku 35 porshento di e bishitantenan a keda den un hotèl “High-Rise”. Kasi djes porshento a keda den un hotel “Low-Rise” i un kuart a keda den un “Timeshare”. Kasi trinta porshento di e turistanan a keda den  akomodashonnan di otro índole.