PHILIPSBURG- E departamentu di aviashon di St. Maarten SMCAA a revoká permit di kompania di aviashon di Republika Dominikana, pa sigui bula pa e isla. 

E prohibishon ta drenta na vigor anochi 12 ‘or dia 5 di ougùstùs próksimo. E paso di SMCAA ta sigui riba rechaso di autoridatnan Dominikano di duna e kompania Winair derecho pa ehekutá buelo entre St. Maarten i Republika Dominikana. 

Segun SMCAA ta nota, tipo di permitnan manera esaki ta sali for di un punto di bista di reprosidat, o sea si kompania di Santo Domingo tin mag di baha na St. Maarten, Winair komo kompania di St. Maarten tambe mester haña permit pa baha na Republika Dominikana. Awor ku autoridatnan na e isla no ke duna permit na Winair, no ta keda SMCAA nada otro di revoká tambe permit di kompanianan di Santo Domingo.

Kompania

E kompanianan ku ta wòrdu afektá di forma inmediato ta Sky High Aviation i Air Century. Ambos kompania tin basta aña ta bula pa i for di St. Maarten, ku vários buelo pa siman. E prohibishon sin embargo ta konta tambe pa e kompania di aviashon nobo ARA. 

SMCAA a urgi e kompanianan konserní pa tuma medidanan nesesario pa evita inkombenensia pa pasaheronan ku ya ta na e isla i ku lo tin ku biaha promé ku dia 6 pa no keda pegá.