KRALENDIJK – Stinapa a konfirmá djaluna anochi ku e krokodel ku a wòrdu kapturá den transkurso di djasabra den área di Lac/Cay, a muri. Segun Stinapa, un outopsia ku ta bai hasi lo mester trese mas klaridat riba e kousa di morto di e animal.

Despues ku a kapturá e animal, a transportá esaki pa un lokalidat sekreto, ku a wòrdu prepará spesialmente pa e proposito aki. Dos veterinario a eksaminá e animal i for di ayera a bisa ku e tabata sufri di síntoma di strès i ku no ta sigur ku esaki lo a sobriví e akshon.

Pa animalnan salvahe (no domestiká) un kaptura ta un kousa regular di morto. Sinembargo, Stinapa a enfatisá ku nan a trata di tuma prekoushon nesesario pa garantisá bienestar di e krokodel.

STINAPA ta sospechá awor ku, a pesar di nan eskuersonan, e faktor di strès a resultá fatal pa e reptil. Stinapa ta primintí tambe ku, asina ku tin mas detaye konosí, lo kompartí esaki.