KRALENDIJK- Sunniva Manuel, Miss Belleza Marina Bonaire, a biaha pa Repúblika Dominicana djasabra atardi, na unda e ta bai kompetí dia 22 di òktober próksimo na e sertamen Miss Belleza Marina Internacional na Punta Cana. Sunniva, pa 1 siman largu tin e honor di representá Boneiru i su playanan riba un plataforma internashonal.  

Miéntras e tabata prepará pa drenta sala di salida na aeropuerto, el a papia ku prensa i tabata kompaña pa e Miss Teen Bonaire nan. 

“Mi a prepará bon i mi ta sinti mi kómodo. Mi a siña hopi di e biba bou di laman i ta sigur ku mi por duna un bon presentashon. Otro siman djasabra ta e dia grandi. Nos mester ta orguyoso di nos isla. Boneiru tin hopi kos kos bunita, ku ta hasi nos number 1 den dje. Kuida nos medio ambiente, esei ta yuda pa loke nos ta dependé di dje, esta e turista i nos ta ehèmpel pa otronan. Por vota p’ami riba e website di e organisashon. Miss Belleza Marina Internacional” asina Sunniva a bisa. 

Partisipante

Na tur tin mas o ménos 20 partisipante ta bai kompetí den e kategoria di edat di Sunniva Manuel. Sunniva ta wòrdu kompaña durante su biahe pa Johnrick Anthony. Aunke ku esaki ta promé biaha ku Anthony ta kompaña un kandidato den un biahe pa eksterior, ela bisa di sinti su mes bon prepará pa e tarea.