ALACATI – E surfdónan hóben Boneriano Storm Nicolai (fin), Tycho Smits (foil) i Bobbi-Lynn de Jong (foil) a optené un medaya di oro den Alacati na Turkia. Tabata parse ku Arxon Gomperts (15) tambe a optené oro, pero a resultá ku den e deláster heat el a start den e grupo robes. El a kaba na di kuater lugá.

Pa e sùrfdónan Boneriano esaki tabata e di kuater Kopa Mundial di e temporada. Anteriormente nan a kore kaba na Aruba, Boneiru i Dinamarka. Mas lat e aña aki tin un Kopa Mundial na Miami. Diferente surfdó hóben a biaha pa Turkia. Tabata promé biaha ku a test e sùrfdónan di bèrdat. E oponentenan Turko a duna bon resistensia den diferente disiplina.

Lucha Nicolai i Smits

Storm Nicolai a demostrá un bon seri den fin. El a gana. Su oponente dirèkt pa e kompetensia mundial Tycho Smits, a hasi nèt dimas fout i a kaba na di ocho lugá. Smits tabata un klase apart si riba foil. El a gana tur wega. Den kategoria U15 tabata parse ku Arxon Gomperts lo a bai gana riba fin. Despues di dos partido e tabata pará number unu. Lástimamente Gomperts a kore den su delaster heat den e grupo robes. Pa e motibu aki e no por a partisipá na e final. Gomperts a kaba na di kuater lugá den su kategoria, pero tin chèns ainda e aña aki pa kué e título mundial mas lat den e aña aki.

Vrieswijk ta gana na Brouwersdama 

Na Brouwersdam na Hulanda Amado Vrieswijk a poderá di e promé premio. E tabatin mag di kita kòrki for di e bòternan di shampaña djadumingu atardi riba e podio di mas haltu. Den e kategoria ‘retired pro fleet’ Nigel Hart a kaba na di tres lugá. Terrence Klappers, ku resientemente ta biba na Hulanda, a bira number dos riba wing.

Famia De Jong ta kué diferente premio 

Bobbi-Lynn de Jong a partisipá siman pasá riba fin i foil. Den e kategoria U17 de Jong mester a laga e Turko Kurtdemir bai su dilanti. Den e último heat tur dos sufdónan tabata por ku otro. E Turko a drenta un tiki promé, di manera ku mas lat e anochi ei el a haña un medaya di oro. De Jong tabata esun mas fuerte riba foil den e kategoria U17.

Den e kategoria U15 Lone de Jong a presta  sublime riba fin. Danki na un viktoria den e di tres wega el a optené un medaya di bròns. Ruman Kit de Jong a gana bròns den kategoria U15 foilslalom