WILLEMSTAD – E konklushonnan di e investigashon di e ròl di famia Oranje i  estado Hulandes den  pasado di sklabitut ta hasi aun mas nesesario pa Hulanda hasi pagonan di reparashon i ku rei ta ofresé diskulpa. Esei Suzy Camelia-Römer, anterior promé minister di Antia Hulandes ta trese dilanti.

E investigashon ta mustra ku famia Oranje a probechá na diferente manera di e kolonianan i konsekuentemente di sklabitut. Segun preisnan aktual famia Oranje a gana sigur 545 mion euro ku e kolonianan Hulandes, kaminda sklabitut tabata ámpliamente plamá. Gobièrnu-, misa-, kompanianan komersial i otro empresanan a hunga un ròl importante via di Estado.

E investigashon “Staat en Slavernij”, ku a sali djaweps, ta resultado di un moshon, kaminda ChristenUnie a pidi dos aña pasá pa laga investigá pasado di sklabitut independientemente i “hasi komprendibel e loke ku a sosodé durante di sklabitut”.

Camelia-Römer ta bisa ku e no a keda sorprendé ku e resultadonan aki. “Kada ken ku konosé historia ta mira un relashon entre sklabitut i Kas di Oranje”. E ta na fabor di pagonan di reparashon na estado a base di un programa, no na personanan individual.

Lo mester uza e sèn pa enseñansa, salubridat públiko i ekonomia, áreanan kaminda e efektonan di kolonialismo i sklabitut ainda ta visibel. Ademas mester sostené e insitutonan di investigashon riba e anterior kolonianan, di manera ku por ehekutá investigashon históriko.