WILLEMSTAD – SVB no mag terminá e kontrakt di kuido ku un partera unilateral ora e yega e edat di 65 aña. Esei Korte na Willemstad ta dikta i ta mustra riba deskriminashon di edat no outorisá i falta di hurisdikshon pa terminá e kontrakt a base di edat.

A introdusí e Ordenansa seguro básiko di gastunan médiko na 2013, entre otro den kuadro di un trayekto di reforma den salubridat pa motibu di e situashon finansiero di pais Kòrsou.

Pa yega na redukshon di gastu den kuido a traha kriterianan adishonal, entre kua un limitashon di edat na momento di alkansá e edat di penshun.

Pero SVB no a sera un kontrakt di kuido ku e partera i otro profeshonalnan médiko. P’esei un terminashon segun e reglanan di 2013 i 2019 no ta al kaso.

E Reglamentu di Koperashon na Seguro Sosial di 1960 ta determiná e relashon legal i esei no ta duna outorisashon na SVB pa terminá e relashon hurídiko ku e partera pasobra el a hasi 65 aña.

Deskriminashon di edat 

Ta papia di deskriminashon di edat prohibí na momento ku su aplikashon ta obligá SVB di trata kasonan igual ku trato desigual, sin ku ta eksistí un hustifikashon ophetivo i hustu.

Aplikashon di un edat di penshun obligatorio ta un forma di deskriminashon di edat, segun Korte. Por sierto e partera no ta empleado di SVB, ku ta obligá di bai ku penshun, pero pa mayoria di su entradanan den su konsultorio e ta dependiente di aseguradonan di SVB. Korte ta konkluí ku en realidat e lo no por ehersé su profeshon rendabel mas despues di a alkansá e edat di 65 aña.

Segun e wes e Nota van Toelichting di e reglamentu di 2019 ta indiká insufisiente ku e límite di edat ta un rekurso apropiá i nesesario pa yega na redukshon di gastunan den kuido.

Esaki no ta konta den kaso di e demandante ku su profeshon di partera so, pero tambe pa tur otro profeshonal médiko konforme e artíkulo di 2019.

Dòkternan di kas

Anteriormente kaba SVB no a haña loke e tabata ke ora ku e kier a obligá e dòkternan di kas pa bai ku penshon ku nan 65 aña. E tempu ei tambe wes a konkluí ku tabata trata di deskriminashon di edat. Aki tambe Korte a konstatá ku deskriminashon di edat no ta kondusí na un kuido mas efisiente.