KRALENDIJK- EntidatPpúbliko Boneiru (EPB) ta bai ku konstrukshon di un bahada pa hende ku limitashon na Parke Tului. Y a tuma e promé pasonan pa realisá esaki. 

Ku e konstrukshon na Parke Tului,  EPB ta bisa ku esaki ta un stap importante pa hasi espasionan públiko mas aksesibel pa un i tur por hasi uso di nan. Den e último dianan por a mira ku STINAPA a pone algun blòki manera di Lego den laman. E blòkinan akí ta sirbi komo barera temporal pa wanta awa di laman durante e trabounan. Na final dje trabou ta kita nan atrobe. A diseñá e blòkinan akí di un material spesial pa nan no okashoná daño na nos koralnan.

Ta ferwagt ku lo kaba ku e trabounan promé ku Pasku. Te na e momento ei, ratu ratu e kaya enfrente Parke Tului lo ta temporalmente será. EPB ta bisa di lo hasi tur loke ta na nan alkanse pa limitá e molèster na un mínimo.