ORANJESTAD – E siman aki a lansa Telefon pa Grandinan na Aruba. E number di e liña pa skucha tin e number 125 i tin komo meta pa sostené i tene kompashon ku personanan di 60 aña òf mas na Aruba. Pa kombatí e sentimentu di soledat i isolashon.

Club Kibrahacha, ku a tuma e inisiativa aki, a ofresé sosten telefóniko durante e pandemia i awor e club a start e proyekto atrobe ku koperashon di Gerente di Asuntunan di Grandinan.

Segun ámbos instansia un kantidat grandi di grandinan ta biba den soledat i no ta aktivo mas den komunidat.

Telefon 125 ta ofresé servisionan i kuido adaptá na e nesesidat di grandinan i ta krea un vishon nobo riba behes na Aruba segun esnan ku a tuma e inisiativa.

“Nos grandinan meresé di ta un parti importante di nos komunidat ku nan eksperensia, konosementu i sabidoria. 125 ta un sosten grandi pa esnan ku tin nesesidat di kontakto sosial i pa skucha nan ku kompashon i empatia. Di e manera aki nos ta yuda nos grandinan pa drenta den kontakto ku otronan na momentunan ku nan ta sinti nan isolá òf so,” segun Club Kibrahacha.

Lema

Mi ta Inclui = komo lema – ta reflehá e meta mas prinsipal di e liña di telefon, pa redusí e sentimentu di soledat i isolashon serka grandinan. Tin hasta un sitio wèb spesial: www.mitainclui.aw i un página di facebook Mi Ta Inclui.