ORANJESTAD – Ministerio Públiko di Aruba a eksigí ayera trabou komunitario di 150 ora i un kastigu di prizòn kondishonal di un luna ku un tempu di prueba di dos aña kontra Kevin Wever (27), yu hòmber di promé minister Evelyn Wever-Croes i Chris Williams (24), yu hòmber di e polítiko Michael Williams.

Ruman hòmber Nigel Williams (33) i Torres Mendez (22), kasá di ruman muhé di e promé minister tambe a risibí sentensia.  A pidi 180 ora di trabou komunitario pa Nigel i un kastigu di prizòn di un luna ku un tempu di prueba di dos aña. Pa Mendez  Minsiterio Públiko a pidi 240 ora di trabou komunitario plùs un kastigu di prizòn kondishonal di tres luna ku un tempu di prueba di dos aña.

A akusá tur kuater di agreshon públikamente. E kaso ta data di 14 di novèmber 2021 ora un diskushon entre e partidonan a bin kaba ku bringamentu den Azia Restaurant na Palm Beach, kaminda e bartènder a risibí leshon i nan a destruí diferente kos den e restorant.

Un aña i mei despues ainda e pleitu no a terminá. Vigilansia spesial di Kuerpo di polis Arubano mester a bini den sala di korte pa pèrkurá ku lo no a bringa atrobe.

E fiskal a aksentuá den su akusashon ku e kaso aki, ku ta konosí komo ‘Flor’, tabatin un impakto grandi riba komunidat i ku lo por tabatin konsekuensia super negativo pa e imáhen di Aruba komo un destinashon turístiko sin peliger.

E restorant ta banda di e asina yamá hotèlnan ‘highrise’ i tabata sirbi na e momentu ei tantu turista komo klientenan lokal. E bringamentu a okashoná káos i pániko bou di e wéspetnan, entre kua tabatin tambe mucha. Segun e fiskal ta un milager ku no a heridá mas hende e anochi ei.

Wes lo dikta sentensia 21 di aprel.