Skirbí pa John Samson di Caribisch Netwerk 

AMSTERDAM – Kantante di ópera Tania Kross a risibí Premio Johannes Vermeer 2023 na Amsterdam. Ta mira e premio di estado komo un di e premionan mas importante pa arte i kultura.

“Ku e premio aki mi ta haña un empuhe enorme pa realisá mi soñonan”, Kross ta bisa na e entrega. Un di e soñonan ta pa konstruí un teater na Kòrsou, kaminda e ta biba awor. Mas ku binti aña pasá un kandela grandi a destruí e teater.

E hurado ta elogiá e mezzosoprano di Kòrsou pa su karera internashonal komo kantante i kon e ta hasi ópera popular pa un públiko grandi. Sekretario di Estado demishonario Gunay Uslu a entregá e premio na Kross.

Den e sala tabatin dosente, dirigente i otro personanan ku Kross a traha kuné. El a gradisí nan ámpliamente. “Hopi biaha hende no sa kuantu esfuerso ta kosta pa trese e esensia di músika dilanti.”

Kross a logra hopi. E ta e promé persona ku a traha un ópera na Papiamentu: Katibu di Shon, segun e buki di Cola Debrot. “Práktikamente úniko den historia di ópera”, segun e hurado.

Kross ta gana 100.000 euro 

Ku e premio Tania Kross ta gana 100.000 euro. E ta bisa ku e ke invertí e sèn den un teater chikitu i tambe den lès di músika pa mucha.

“Mi no ta eksepshonal ètòl na Kòrsou. Tin hopi Tania ta kana rònt na Kòrsou”, e ta bisa. “Ku e sèn aki mi por duna hendenan chèns den e teater chikitu ei pa desaroyá nan mes awor kaba pa teater.”

E teater chikitu ei ta bini den un sala bieu ku ta uza awor aki komo depósito pa un kas di grandi.

Teater
Kross ta dal stapnan den su plan pa un teater. El a haña un tereno serka Curaçao Airport Holding pa konstruí e teater. “Mi tin 18 luna pa realisá esaki. Ami lo lucha pa esei!”

“Mi ta spera ku bo soño bira realidat i mi tin hopi konfiansa den esei”, sekretario di estado demishonario Uslu ta bisa. “Pasobra algu mas a hala mi atenshon durante mi bishita na Kòrsou. E hende muhé: nan ta manda na Kòrsou! I abo ta un bunita ehèmpel di esei.”

Promé ganadó Karibense 

Ta pa promé biaha ku un Hulandes di e partinan Karibense di nos Reino ta risibí e Premio Johannes Vermeer. Den un video diferente artista di Kòrsou ta gradisi’é pa su prestashonnan.

“Mi orguyo no tin límite!”, kantante i presentadó Giovanca ta bisa entre otro. “Kòrsou ta super orguyoso di bo. Bo mester sa esei!”

Pianista estelar i kompositor Randal Corsen, ku tambe ta un bon amigu di Kross, ta gradisi’é pa e loke el a logra pa e isla. “E ta mustra nos ku trabou duru, dedikashon i disiplina den mundu musikal por hiba nos hopi leu.” 

Eksposishon na Den Haag

Risibiendo e premio Kross por a inougurá tambe un eksposishon propio di su trabou na ministerio di Enseñansa, Kultura i Siensia. Por bai bishit’é grátis te medio mart 2024.

E ta mustra kon su orígen Kurasoleño a alimentá su karera músikal. “Kòrsou ta músika”, segun Uslu. “E músika einan bo ta sinti den kada sèl di bo kurpa. Mi por a eksperensiá esei tambe ora mi a keda einan.”

E loke Kross ta hasi ku ópera, ta ‘kanta, sinti i traspasá tur e kantikanan ei’, Uslu ta bisa. “Di manera ku ta konservá nan i ku nan tin nifikashon pa generashonnan nobo tambe atrobe.”