ORANJESTAD – E Rubiano Frederick ‘Rudy’ Franken, ku ta sospechoso for di  kuater aña pasá ku el a hinka su propio yu RJ di tres aña mata, a atmití su kulpabilidat pa loke el a hasi na luna di mart 2019 den un korte Merikano na Florida.

Entretantu a kondená Franken pa asesinato premeditá di promé grado i lo mester sinta un kastigu di bida largu den prizòn sin posibilidat di apelashon.

Mama di RJ, Darelly (Rivera) van Dieren, a konfirmá esaki eksklusivamente na e portal di notisia NoticiaCla. “Tabata un lucha di kuater aña, pero finalmente el (Frederick Franken: red) a baha su kabes,” segun e mama di RJ.

Mientras Rivera ta bisa ku el a pèrdè tur kos inkluso su karera militar, e ta sigur ku e ta mas fuerte ku nunka. “E kapítulo aki ta será i awor mi por sigui ku mi bida. Un kapítulo nobo, pero ku mi yu hòmber den mi pensamentu,” Van Dieren ta bisa NoticiaCla.

“Lo mi sinti falta semper di mi yu hòmber!” e ta agregá. Pa loke ta trata e kaso, segun Van Dieren e intenshon tabata pa bai korte djaluna pa apelá, pero e hòmber a kambia su deklarashon inesperá e siman aki den korte.