KRALENDIJK- Tourism Corporation Bonaire (TCB)  firma djamars un akuerdo di kolaborashon i merkadeo riba término largu ku e artista lokal i e strea internashonal ku ta subiendo Luigino Molina, mihó konosí komo Luis Moka.

“Nos ta rekonosé su tremendo talento i personalidat. Personalmente mi ta konsider’é komo un strea hóben i talentoso ku ta subiendo. Mester selebrá e dedikashon i esfuersonan di Luis Moka pa mantené nos tradishonnan lokal bibu pa medio di músika. TCB ta rekonosé su esfuersonan pa kompartí nos patrimonio lokal i nos músika i manera di biba krioyo ku mundu i promov’é esakinan”, asina direktor di TCB, Miles Mercera a bisa na e okashon. 

Rebranding

Na e momentu akí TCB ta trahando riba un proyekto nobo di ‘rebranding’ bou di e título “Reposishonamentu di Boneiru den harmonia ku nos naturalesa i nos hendenan”, kaminda nos músika i tradishonnan kultural ta hunga un ròl klave den nos esfuersonan pa loke ta trata komunikashon.’  

Luis Moka a bisa: “Mi ta sinti mi honrá i emoshoná i mi ta kla pa sigui promové nos músika, baile i ritmo lokal. Di Rincon pa mundu.”