KRALENDIJK- Tourism Corporation Bonaire (TCB) a lansa  Capture Bonaire Photo Contest 2024 ‘This is the Feeling You Have Been Searching For’ – Kompetensia di saka potrèt Kapta Boneiru 2024.

E aña akí e kompetensia ta enfoká riba kon pa kapta e eksperensia emoshonal úniko ku Boneiru ta brinda na tantu su poblashon lokal, komo na su bishitantenan internashonal. 

E kompetensia ku ta tuma lugá for di 23 di ougùstùs te ku 19 di sèptèmber 2024, ta enkurashá e partisipantenan pa kompartí potrèt ku ta reflehá e bunitesa impreshonante di nos isla i e emoshonnan ku nan eksperensianan ta okashoná. 

Intenshon di e kompetensia ta pa pone énfasis riba e diversidat di emoshon ku Boneiru ta okashoná, sea ta trata di eksitashon, trankilidat òf deskubrimentu. Ta un manera pa trese hende mas serka e magia di Boneiru atraves di lèns di e personanan ku a yega di eksperensiá esaki kaba.