KRALENDIJK- Tourism Corporation Bonaire (TCB) ta persist den su mentira tokante e impuesto nobo pa turista, e asina yamá Visitor Entry Tax (VET).

Djaweps TCB a saka un relato di prensa pa splika ku riba website di www.bonaireisland.com por haña pregunta i kontesta frekuente tokante e impuesto nobo aki.

Riba e pregunta ‘E Visitor Entry Tax ta un impuesto adishonal’, TCB ta duna e kontesta “E visitor Entry Tax no ta un impuesto adishonal. E ta remplasá e loke antes tabata Room Tax i Carrental Tax. 

Loke TCB no ta skibi, ta e echo ku tin un grupo di turista basta grandi, voral pa loke ta trata famia i amistat ku ta bishitá awor tin ku bai paga sea 75 dòler òf 10 dolar den kaso ku nan ta biba na un di e anterior islandan di Antia Hulandes. 

TCB lógikamente sa esaki bon bon, igual ku nan sa ku debidamente ta trata di un ordenansa nobo i pesei un tipo di impuesto i un manera di kobra impuesto nobo, ku antes no tabata eksistí. Tambe, ta spera un entrada adishonal di 4 mion pa aña, ku supuestamente ta bai wòrdu gastá na drechamentu di infrastruktura.