MIAMI – Tin awor aki un aktividat aselerá den Oséano Atlántiko ku dos sistema di wer ku ta opservando  minusiosamente pa posibel desaroyo tropikal. Pero e sistema mas urgente ta e potensial siklon tropikal 6 den Laman Karibe, ku lo por krese bira un siklon tropikal dentro di 24 ora i ku lo haña e nòmber Francine.

E sistema aki ta produsí kaba bientunan ku forsa di orkan tropikal i mester di solamente un sentro di sirkulashon bon definí pa por rekonos’é komo un siklon tropikal ofisial. E espektativanan ta ku e sistema lo sigui intensifiká bira un orkan i djarason lo yega tera  na kosta ost di Texas òf riba Louisiana. E chèns pa desaroyá dentro di 48 ora ta kalkulá na nobenta porshento.

Oséano

Un otro sistema, konosí komo Invest 92L, ta situá riba e sentro di Oséano Atlántiko. E sistema aki tin organisashon limitá, pero e sirkunstansianan den serkania ta favorabel pa e sigui desaroyá.

E chèns riba desaroyo dentro di 48 ora ta sesenta porshento, mientras ta kalkulá e chèns dentro di shete dia riba setenta porshento. E sistema ta move den direkshon wèst ku un velosidat di masomenos djesseis km pa ora i lo por alkansá nortost di Laman Karibe na fin di otro siman i ta ten’é minusiosamente na bista.

Tin un di dos sistema tras di Invest 92L, wèst di islanan Kaapverdië i ta produsí un área hanchu di awaseru no-organisá i mal tempu. E sistema aki ta mustra tiki moveshon i lo bai un posibel interakshon e dianan benidero ku un ola tropikal ku ta biniendo di kosta di Afrika den direkshon wèst. E chèns riba desaroyo den 48 ora ta hopi abou, ménos ku djes porshento, pero esei ta krese te sinkuenta porshento dentro di shete dia.

Servisio di Orkan Nashonal na Miami ta keda monitòr e sistemanan aki minusiosamente, pasobra nan por sigui desaroyá bira orkannan peligroso. Pa awor aki ta atribuí e menasa pa área di Karibe solamente na Invest 92L, pero ta konsehá habitantenan di e region pa keda alerta, pasobra e temporada di orkan ta birando mas i mas aktivo.