‘Hasi e lei mas perfekto posibel stap pa stap‘

KRALENDIJK – Elvis Tjin Asjoe, lider di frakshon di MPB den Konseho Insular, durante e reunion di Komishon Fiho pa trata introdukshon di e ordenansa pa prohibishon di plèstik di uso un solo biaha, a pidi pa hasi e lei mas perfekto posibel, pasobra ainda falta algun produkto ku mester inkluí den e lei, pero laga nos pasa e lei aki mas lihé posibel pa nos kuminsá kita e produktonan aki for di nos naturalesa.

E lider di frakshon di MPB a puntra, di e lista di produktonan di plèstik ku ke deshasí di dje, e kantidat ku ta importá i e impakto riba nos naturalesa ta konosí.

Tjin Asjoe: “Den kombersashon ku un di e kompanianan ku ta importá baki di fom, ta papia di 1 mion pa aña, òf kasi 3 mil pa dia ta resultá riba tereno di Landfill, òf nan ta resultá den naturalesa, òf den laman, sin konta a bakinan di fom pa hotdog, hamburger i belèg.”

Tjin Asjoe a puntra, kiko ta e porsentahe ku e lei aki ta kita. Si ta un idea ku e lei no ta perfekto pa kuminsá tòg i hasi e lei mas perfekto posibel stap pa stap, pasobra tin sentido di urgensia pa tene nos Boneiru limpi. Nos mester kuminsa awor i poko poko, na kaminda por agregá otro kosnan di plèstik di uso un solo biaha ku no ta den e lei ainda.

Pa loke ta trata statiegeld, Tjin Asjoe ke sa kon ta ku introdukshon di statiegeld, kon leu ta ku esei. Ta algu ku e ta mira ku gobièrnu sentral ta atende i mester ta algu ku nos aki na Boneiru tambe mester bai introdusí resolviendo e problema di bòter di plèstik. Si Boneiru introdusí statiegeld, lo no mira ningun bòter di plèstik ni di glas tirá abou mas.

Tjin Asjoe a puntra, trahando e lei aki, gobièrnu a konsultá ku otro islanan den region, nos ta siñando for di nan kon nan a hasié. Nos a kompará e lista di plèstik ku nos ke saka for di naturalesa ku nan lista. Laga nos pasa e lei aki pa kaba, pasobra ta for di 2018 frakshon di MPB a pasa un moshon den Konseho Insular pa bini ku e lei aki. Tur dia di nobo nos ta susha Boneiru tanten ku e lei aki no ta na vigor, segun Tjin Asjoe.