Kralendijk – Tourism Corporation Bonaire (TCB) ta habri luna di yüni ku dos prensa di Oropa di sumo importansia na Boneiru. Den e promé siman di yüni, TCB den kolaborashon ku Diamond Public Relations Oropa a risibí prensa di National Geographic Traveler Nederland i tambe prensa di e revista DUIKEN na Boneiru.

Dia 6 di yüni último, Haroon Ali, kende ta un eskritor hulandes independiente, kolumnista i tambe ‘podcaster’, a bishitá Boneiru pa skirbi un reportahe di 8 pa 10 página pa National Geographic Traveler Nederland, tokante sostenibilidat na Boneiru, esfuersonan ku ta wòrdu hasi riba tereno di durabilidat i kon bishitantenan por duna un man. Haroon ta skirbi artíkulo tambe pa varios medio grandi na Hulanda, manera pa e revista LINDA, Het Parool, De Volkskrant, Trouw, De Morgen, Harleems Dagblad i Noordhollandse Dagblad.

Frederik ‘Frits’ Meijst ta un fotógrafo spesialisá den fotografiá bou di awa i ku a bishitá Boneiru spesialmente pa saka imágen di Boneiru pa e artíkulo benidero. National Geographic Traveler Nederland ta un revista imprimí i tambe ku plataforma online dirigí na e merkado hulandes ku tin un gran interes den naturalesa i ku gusta biaha. E revista i plataforma online ta risibí mas ku 221 mil lesadó.

Durante di nan estadia, Haroon i Frits a keda na dos diferente akomodashon, EcoLodge Bonaire i Delfins Beach Resort. Ámbos akomodashon tin diferente inisiativanan i esfuersonan ku ta wòrdu hasi riba e tereno di durabilidat i sostenibilidat, manera uso di energia alternativa. Tambe, Haroon i Frits a bishitá varios partner lokal i organisashon ku ta enfoká riba sostenibilidat i durabilidat di Boneiru, manera Mangrove Maniacs, Reef Renewal Bonaire i STINAPA. Alabes, Haroon i Frits a bishitá varios empresa i persona lokal ku ta organisá aktividatnan eko-aventura i nan a partisipá na diferente di e aktividatnan aki, manera kayak den palu di mangel, sambuyá na diferente laman i ‘land sailing’. Ademas, durante di su estadia, Haroon a skirbi un kolumna pa Noordhollandse Dagblad tokante di su promé dianan na Boneiru. Por lesa e kolumna riba e website https://www.noordhollandsdagblad.nl/cnt/DMF20210609_9057285.

Tambe na kuminsamentu di yüni, a risibí prensa di e revista DUIKEN. Judith Rietveld ta e editor ehekutivo di e revista DUIKEN i huntu ku e fotógrafo Daniel Versteeg, nan a bin Boneiru pa skirbi un reportahe spesial di 9 página den e revista i tambe pa skirbi un reportahe spesial di 52 página riba e plataforma digital, tokante di historia di lokalnan na Boneiru ku tin un konekshon ku laman. Durante di nan estadia, Judith i Daniel a bishitá varios persona lokal i organisashon, manera Sea Turtle Conservation Bonaire, Reef Renewal Bonaire, Freediver i Mangrove Maniacs. E bishita aki ta parti di e plan di rekuperashon bou di e meta pa atrae e merkado eksistente hulandes i sambuyadó.

DUIKEN ta e revista hulandes di mas grandi imprimí i tambe ku plataforma online, dirigí na e merkado di sambuyadó na Hulanda, Bèlgika i Karibe Hulandes.

“Nos ta kontentu di por a risibí prensa di National Geographic Traveler Nederland i tambe di e revista DUIKEN na Boneiru,” Derchlien Vrolijk, Marketing Coordinator di TCB, a bisa. “Nos ta sumamente orguyoso di e inisiativanan i esfuersonan ku nos partnernan, organisashonnan i habitantenan ta hasi riba e tereno di durabilidat i sostenibilidat na Boneiru. Boneiru ta un di e islanan mas outéntiko den Karibe, ku e vishon pa bira e promé ‘Blue Destination’ den Karibe, kaminda ku habitantenan i bishitantenan por disfruta di un naturalesa bon konservá. Ta pesei nos ta sigui amplia e visibilidat di Boneiru i tur lokual ku e isla tin pa ofresé riba e tereno di durabilidat i sostenibilidat, aktividatnan eko-aventura i buseo pa futuro bishitante.”

---

Lesa tambe:

• 
  Sindikalismo na Boneiru parti 47, 25 di novèmber 2024
• 
  Curoil ta hasi su mes kulpabel na komportamentu sin rèspèt, pero gobièrnu ta tolerá esei 
• 
  Gobièrnu di Boneiru ta urgi solushon pa suma di impuesto liber i salario mínimo
• 
  M21 ku krítika duru riba Curoil pa problema ku depósito pa bòter di gas 
• 
  Atrobe atrako armá na Boneiru: E biaha aki riba supermerkado