KRALENDIJK- Tourism Corporation Bonaire (TCB) tin diferente aktividat planeá den kuadru di e dia di turismo, ku sa selebrá anualmente dia 27 di sèptèmber. 

For di djasabra 3 di sèptèmber 2022 tur bishitante ku yega nos isla ta haña un bon biní personal na Flamingo International Airport ku e ritmo boneriano di nos músika folklóriko lokal. Banda di esei bishitantenan por saka potrèt ku nos hendenan lokal den trahe folklóriko tradishonal. Komo muestra di apresio tur bishitante ta risibí un regalo di bon biní komo parti di nos programa pa mantené bishitante, yamá Embahador di Boneiru.

Riba djabièrnè 2 di sèptèmber TCB a organisá su evento di tur luna ‘Tourism after 5’. Durante e evento akí TCB a yama bon biní na Bonaire Bikers Club i su partnernan, ku na honor di Dia di Boneiru lo organisá diferente aktividat na nos isla. Tambe Rolando Marin, e ‘Information Officer’ di TCB, a keda honrá pa su 28 aña di trabou pa TCB i 34 aña di trabou den sektor turístiko. Sr Robert Loyd prosedente di Merka tambe a risibí rekonosimentu pa e 30 añanan ku e ta bishitá Boneiru. Atraves di tur e añanan akí sr Lloyd a keda den diferente akomodashon na nos isla i e último añanan e ta hospedá na Buddy Dive Resort.

Buki

Den koperashon ku e outor Denise de Jong-Rekwest, TCB a krea tambe un buki di turismo titulá: ‘Turismo na Boneiru, Mi Kultura, Mi Enkanto!’ ku dia 22 di sèptèmber ta keda lansá ofisialmente. Dia 23 di sèptèmber lo entregá e buki di turismo akí na tur skol na Boneiru, komo un medio di instrukshon pa siña mas tokante nos turismo, nos patrimonio lokal i nos kultura.

Dia 26 di sèptèmber TCB ta organisá su di dos Kumbre Turístiko Boneiru anual ku komo meta pa trese nos stakeholdernan aktivo i nos partnernan den turismo huntu pa papia tokante nos branding, nos komunikashon aéreo, nos merkadeo i nos strategia di relashonnan públiko i kompartí e último trèntnan i desaroyonan turístiko ku nan.

Taste of Bonaire

E aktividatnan di e Luna di Turismo ta terminá riba djabièrnè 30 di sèptèmber. E ora ei TCB ta organisá su evento di Taste of Bonaire. E tema di e evento ta enfoká riba Turismo i Kultura. Pa enbolbí nos hóbennan mas ku nos aktividatnan kultural, nos ta organisá un kompentensia di baile lokal eskolar ku nos músika tradishonal.