WILLEMSTAD – Djarason 21 di yüni Germaine Rekwest, a parafrasiá na nòmber di Minister di Finansas, Javier Silvana, un akuerdo di impuesto ku San Marino pa evitá impuesto dòbel.

Den e lunanan ku a transkurí Kòrsou a negoshá ku San Marino riba e reglanan ku mester ta konforme normanan internashonal. Tambe a introdusí un ekstenshon ku ta hasi posibel ku por ámplia e tratado pa otro partinan di Reino (Aruba, Sint Maarten i Hulanda). A parafrasiá e tratado di impuesto kaba na 2017, pero el a keda drumi despues ku Kòrsou no a kontestá preguntanan di Ministerio di Asuntunan Eksterior (Hulanda).

Mientrastantu a kontestá tur pregunta ku a keda habrí. Ta finalisá e paráfrasis di e tratado den koperashon ku Ministerio di Asuntunan Eksterior, huntu ku un teksto di splikashon, di manera ku e minister di Asuntunan Eksterior por firm’é. Despues ta kuminsá ku e proseso di ratifikashon.

Kòrsou i San Marino tin infrastruktura finansiero komplementario. Den e kaso aki e merkado finansiero di Sur-Europa ta hasi uzo entre otro di posibilidatnan finansiero ku San Marino ta ofresé komo sentro finansiero. E konosementu di e merkado aki i atraé invershonistanan, ku Kòrsou komo sentro den region Karibense i di Amérika Latino, tin laso estrecho ku otro.

Kòrsou i San Marino a komprometé nan mes na Normanan mínimo di BEPS i ta determiná pa sigui fortifiká nan relashonnan finansiero-ekonómiko den e konteksto aki.