DEN HAAG – Sekretario di Estado Van Huffelen a papia ku prensa despues di e diskurso di rei riba Prinsjesdag i a anunsiá ku lo implementá mésora, entrante 1 di òktober, oumento di entradanan pa Karibe Hulandes. Por ehèmpel ònderstant pa un soltero ta subi ku 63 dòler pa kada dos siman.  E gabinete ta destiná entrante 1 di yanüari 2024 trinta mion euro pa mehorá forsa di kompra. For di 2025 ta subi e montante aki na 32 mion euro pa aña.

E sèn ta bai entre otro pa oumentá e supsidionan den Karibe Hulandes den 2024, kaminda tin ku stipulá e oumento eksakto ainda. Van Huffelen ta bisa di no ke warda riba esaki i p’esei ta oumentá e entradanan entrante 1 di òktober kaba.

Na Boneiru e suma adishonal pa biba riba nan mes pa soltero ta subi ku 32 porshento, na Saba ku 25,1 porshento i na Sint-Eustatius ku 9,4 porshento. Ku e oumento aki solteronan ku ta biba riba nan mes i ku tin derechi riba ònderstant (kompleto) ta risibí un pago di ònderstant pareu na e referensia mínimo sosial. Pasobra ta paga ònderstant kada dos siman, esaki ta nifiká un oumento di 63 dòler kada dos siman pa solteronan ku ta biba riba nan mes na Boneiru. Na Saba e pago kada dos siman pa solteronan ku ta biba riba nan mes ta subi ku 58 dòler i na Sint-Eustatius ku 22 dòler.

Penshun di Biuda i Wérfano (AWW) tambe ta subi entrante 1 di òktober na e nivel di referensia mínimo sosial. E haltura di e AWW pa por ehèmpel biudanan di 58 aña na Boneiru ta subi ku 111 dòler, na Saba ku 98 dòler i na Sint-Eustatius ku masoménos 19 dòler i ta bira pa luna 1.030 dòler na Boneiru, 1.171 dòler na Saba i  1.101 dòler na Sint-Eustatius.

Por stipulá e mínimo sosial na Boneiru, Saba i Sint-Eustatius despues di resultado di e rapòrt di e komishon Thodé ku probablemente ta keda kla komienso di òktober.

Kompensashon pa yu ta subi ku 90 dòler pa yu pa luna. Esaki ta den kuadro di e ambishon pa baha pobresa di mucha den 2025 ku mitar. Ademas gabinete ta mantené e kompensashon di energia di $ 1.300 pa personanan ku ta bini na remarke pa esaki. Supsidio di gastunan fiho di koriente i e tarifa fiho di awa i e gastunan di konekshon pa internet ta sigui baha. Tambe ta bai tur aña 700.000 euro èksta pa mihó transporte públiko i gastunan di transporte mas abou.

Sekretario di Estado Van Huffelen: “Pa hopi hende na Boneiru, Saba i Sint-Eustatius un dak riba bo kabes, pan riba mesa òf materialnan èksta no ta algu di mes. E gabinete kier hasi algu na esaki. P’esei mi ta kontentu ku huntu ku kolega Carola Schouten nos a logra pa pone un suma kuantioso un banda, no pa e aña aki so, pero tambe pa e próksimo añanan, pa mehorá bida di habitantenan riba e tres islanan. Pa kuminsá oumentando e kompensashonnan, pero tambe kontribuyendo ainda na servisionan básiko manera awa i koriente. Nos no a yega ainda, pero e ta un paso importante ku ta kontinuá pa atendé ku pobresa riba e islanan. Pesei mi ta ansioso pa mira e konklushonnan di e komishon mínimo sosial. Sabiendo ku Reino, dunadónan di trabou, entidatnan públiko i e habitantenan mester di otro pa krea un nivel di servisionan ekivalente i baha gastunan di kosto di bida.”