KRALENDIJK – Organisashon di biahe TUI a anunsiá ku den koperashon ku Dunaf nan lo bai instalá djes stashon pa rekargá pa transporte eléktriko na Boneiru. Meta di e inisiativa aki ta pa promové preservashon di e isla i stimulá uzo di transporte eléktriko.

Aktualmente TUI ta deliberando ainda ku gobièrnu pa determiná unda eksaktamente e stashonnan pa rekargá ta bini, pero ta preferá di pone nan na Sorobon i otro playanan konosí i sitionan manera Rincon i 1000 steps.

E proyekto na Boneiru ta kuadra ku e inisiativa mas grandi di TUI, kaminda lo bai pone na tur 55 stashon pa rekargá riba e islanan ABC. A kuminsá kaba ku instalá e stashonnan di rekargá na Kòrsou i despues lo sigui pa Aruba tambe. TUI i Dynaf tin komo meta pa krea un infrastruktura fuerte pa stashonnan di rekargá, di manera ku korementu eléktriko sin problema ta bira posibel riba e islanan.

Ta uza e produkto Fair Travel di TUI pa hasi finansiamentu di e stashonnan di rekargá posibel. Ku kada biahe Fair Travel ta inkluí dos euro pa persona den e gastu di biahe, ku TUI na su turno ta dupliká. Ta invertí e sèn aki den proyektonan pa duna sosten na hendenan lokal i ekonomia pa medio di TUI Care Foundation, méskos ku ta bai pasa ku konservashon di mobilidat. Ademas ta alohá  pasaheronan ku un biahe Fair Travel semper den akomodashonnan ku un etikèt di sostenibilidat rekonosé.

TUI i Dunaf ta aspirá pa realisá e proyekto mas lihé ku ta posibel, di manera ku Boneiru por probechá di un infrastruktura di rekargá konfiabel pa vehíkulonan eléktriko. Instalashon di e stashonnan di rekargá ta sumamente importante pa garantisá akseso pa rekargá elektrónikamente na puntonan stratégiko riba e isla.