KRALENDIJK- Turismo na Boneiru ta rekuperando hopi bon for di e Pandemia di COVID-19 ku a azotá no solamente nos isla, pero tambe biahamentu i turismo rònt mundo. Durante vários luna di 2020, no tabata pèrmití niun avión yega Boneiru for di eskterior. 

E di dos kuartal di 2022 ya ta mustra hopi bon. No solamente turismo a logra rekuperá hopi bon for di e aña 2021 ku ainda tabata difícil, pero turismo den su totalidat a rekupera kasi 70% di e sifranan promé ku COVID. 

Djabièrne atardi tabata tin varios oradó ku a konta algu tokante estado di turismo, manera diputado Hennyson Thielman, direktor di TCB Miles Mercara, Veroeshka de Windt di TCB, Jody Diamond ku ta enkargá ku merkadeo, Onno de Jong di BIA i tambe havenmeester Gunther Flanegin. 

Sifra

Por nota ku turismo a rekuperá bek hopi bon ora ta trata di hotel i tambe kantidat di vuelo. BIA ta registrando asta mas vuelo ku tabata e kaso den aña 2019, i Bonhata ta registrando un okupashon di no ménos ku 82% den e di dos kuartal. 

Turismo krusero, sin embargo, ta kedando atras. Flannegin di su parti a splika ku e kantidat di barku ta regreando na e kantidat di antes, pero no a kantidat di pasahero riba nan, ku ta ainda un Frakshon di loke e tabata ta promé ku COVID-19. 

Futuro

Diputado Thielman, Miles Mercera i tambe Onno de Jong a papia hopi tokante plannan pa futuru. Tur tres persona, reakshonando riba pregunta di prensa lokal, mester a atmití ku ainda falta hopi pa hasi e sector turístiko verdaderamente atraktivo komo un empleado. Asina mester traha riba mas entrada, pero tambe otro fasilidat manera estudio i un sistema di penshun pa trahadó den e sektor aki.