KRALENDIJK- E kantidat di barku krusero ku a yega Boneiru a kuminsá subi poulatinamente for di sèptèmber 2021.

Den e último lunanan di e aña ei Boneiru a risibí 56,6 mil pasahero krusero. E tráfiko di barku krusero a para kompletamente ora na medio mart 2020 e restrikshonnan relatá ku COVID-19 a drenta na vigor.

Na novèmber i dezèmber 2019 e kantidat di pasahero di barkunan krusero ku a bini Boneiru tabata alrededor di 52 mil i 68 mil; na aña 2021 den e mésun lunanan e tabata solamente 18 mil i 35 mil. Promé ku e pandemia di COVID-19 mayoria pasahero di barku krusero tabata bishitá Boneiru den lunanan novèmber, dezèmber, yanüari i febrüari.

Turismo ku ta bini ku avion

Na 2021 111,3 mil persona a yega Boneiru ku avion. Esei tabata 30 porshento ménos ku na 2019 promé ku e krísis di COVID-19. Den e di dos mitar di 2021 e tráfiko aéreo a restablesé asina lihé ku den e di kuater kuartal di 2021 mas hende a bishitá Boneiru kompará ku e mésun periodo na 2019 (40 mil).

Na 2021 4,1 mil persona a bishitá Saba hasiendo uso di avion. Esei tabata mas ku aña pasá, ora apenas 2,7 mil hende a bini. E tabata ainda 56 porshento ménos ku na 2019, e aña promé ku e pandemia.

Na 2021 3,6 mil bishitante a bula bai Sint Eustatius, mientras ku dos aña pasá e kantidat tabata ainda kasi 11 mil. Na 2021 e tabata un tiki mas haltu ku na 2020 ora ku a bini 3,2 mil bishitante.

Sint Eustatius a konosé meskos ku Saba un subida di bishitante ku a drenta ku avion, pero e total tabata ainda bou di e nivel di promé ku e pandemia.