ORANJESTAD – Archivo Nashonal Aruba ta drentando su último siman ku e kampaña-3C, ku a kuminsá na luna di yüni i ku a prolongá ku seis siman na luna di yüli. E kampaña-3C ta enkurashá habitantenan pa entregá material pa archivá, manera dokumentunan históriko, pòtrèt i archivonan oudiovisual i digital na archivo nashonal.

Di e manera aki komunidat ta kontribuí na preservashon di nos historia i kultura pa generashonnan di futuro.

Marens Engelhard, anterior ofisial di registro mayó di Hulanda:”Loke ku nos archivá awe, ta signifikativo pa e imahen ku generashonnan di futuro lo tin di nos tempu.”

Segun e ofisial di registro e ta un tarea fasinante i responsabel, pero e no ta un tarea fásil pa skohe e loke ku nos ke archivá pa e futuro deskonosí. ‘Pues laga e ta un esfuerso komun pa konservá nos historia.”

Archivo Nashonal Aruba ta gradisí un i tur ku a entregá material kaba. Entre nan tin dokumentunan digital i di papel, rekortenan di korant, pòtrèt, video, pinturanan, poster i kasèt ku entrevistanan di programanan di radio.