Na 2021, mas o ménos 20 porshento di e poblashon di 15 aña òf mas grandi na Boneiru i Saba a bisa ku e tabatin problema pa lora ku su entrada. Na Sint Eustatius, esaki tabata mas haltu, mas ku 30 porshento. Na 2017, e situashon na Saba tabata otro: 36 porshento di e poblashon a indiká ku e tabatin problema pa lora ku su sèn. Esei ta resultá for di sifra di CBS ku aparishon di e publikashon The Caribbean Netherlands in numbers (Hulanda Karibense den sifra).

Na 2021, al rededor di 15 porshento di e poblashon na e tres islanan a bisa ku e gastunan mensual di bibienda tabata forma un peso finansiero haltu. Na Saba i Boneiru, e porsentahe aki tabata mas haltu na 2017, na Sint Eustatius nò.

Diferensianan sigun nivel di enseñansa

Problema pa lora ku sèn tin di haber ku e nivel di enseñansa. Na Sint Eustatius, hende ku edukashon abou tabatin kasi dos biaha mas tantu problema pa lora ku su sèn ku hende ku edukashon mas haltu; respektivamente 40 i 20 porshento. Na Boneiru, e kantidat ei tabata kasi tres biaha mas tantu serka hende ku edukashon abou (29 porshento) ku serka hende ku edukashon mediano òf haltu (10 porshento). Na Saba, no tabatin diferensia entre hende ku edukashon abou i mas haltu.

No tin sufisiente sèn pa gastu spesífiko

Riba tur tres isla, mas o ménos 70 porshento di e poblashon a indiká ku nan no tin sufisiente sèn pa un òf mas gastu spesífiko. Esaki tabata varia di pago di un kuminda kayente ku karni, galiña òf piská kada pasa un dia (ku 10 porshento esun di mas abou na Boneiru) te pa pago di gastu nesesario inesperá (ku 60 porshento esun di mas haltu na Sint Eustatius). Na tur tres isla, mitar di e poblashon no tabatin sufisiente sèn pa remplasá mueble gastá, i mas o ménos 45 porshento no tabata por a bai ku fakansi un siman kada aña.

E porsentahe di hende ku a indiká ku e no tin sufisiente sèn pa kumpra paña nobo regularmente, tabata diferensiá hopi pa kada isla: di 15 na Saba pa 45 na Boneiru. Tambe e porsentahe di hende ku no tabatin sufisiente medio finansiero pa por lo ménos un biaha pa luna invitá konosí òf miembro di famia pa bin kome, tabata varia pa kada isla. Na Saba esei tabata mas ku 25 i na Sint Eustatius mas ku 35.

Preokupashon tokante futuro finansiero

Na Sint Eustatius, kasi 60 porshento di e poblashon tabata preokupá hopi tokante e futuro finansiero. Na Boneiru i Saba, esaki tabata mas o ménos 45 porshento, partikularmente hende ku un edukashon abou i mediano tabata preokupá hopi riba e dos islanan aki. Na Boneiru, ku 50 porshento, hende entre 15 ku 45 aña tabata preokupá mas tokante nan futuro finansiero kompará ku hende riba 45 aña. Partikularmente na Saba, tabatin mas hende muhé (51 porshento) kompará ku hende hòmber (38 porshento) ku tabata preokupá.