WILLEMSTAD – E kantidat di keho di konsumidó na Kòrsou ta subi kada dia. Fundashon Interes di Konsumidó na Kòrsou kasi no por prosesá e kehonan. Ta parse ku un paro temporal di keho ta na kaminda, presidente Maria van Os ta bisa.

E tabata esun ku a tuma e inisiativa i ta awor e úniko kolaboradó di Fundashon Interes di Konsumidó na Kòrsou. “Hendenan ta pensa ku nos ta un organisashon grandi, pero en realidat ta mi so ta atendé e kehonan. Ku e oumento grandi di keho mi ta trahando kasi 70 ora pa siman”.

For di dia ku a lanta e fundashon a drenta 175 keho di konsumidó i aktualmente tin ainda djes pa trata. A solushoná e sobrá kehonan satisfaktoriamente.

“Tin keho ku bo ta solushoná lihé, otro keho ta dura mas largu, anto e ora ei mi ta referí spesialmente na kehonan ku ta relashoná ku gobièrnu i instanshanan di gobièrnu”, Van Os ta bisa.

Motibu di e peso di trabou enorme ta pasobra bo ta manda vários rekordatorio ora bo no haña kontesta,. “Na final ta solushoná e kehonan ei tambe, pero bo mester dediká hopi tempu i energia.”

No tin supsidio

Konsientemente Fundashon Interes di Konsumidó na Kòrsou no a apliká pa supsidio. “Nos ke keda independiente komo organisashon di konsumidó, sin partisipashon di polítika òf komèrsio. Esei ta hasi e trabou mas difísil.”

“E fundashon no tin presupuesto pa kolaboradó, ofisina i gastunan fiho. Pa komparashon: Fundashon pa Konsumidó ku tin sinku kolaboradó, stazjèr i un supsidio di mas ku 400.000 florin pa aña a solushoná segun su relato di aña 2018 den un aña 53 keho di konsumidó.”

Proyekto spesial

Ya ta un aña ku Fundashon Interes di Konsumidó na Kòrsou a prepará un proyekto kontínuo  pa duna informashon na konsumidó tokante nan derechonan.

“Pa e proyekto aki mi ke a pidi un kontribushon pa un solo biaha na Ministerio di Desaroyo Ekonómiko. Durante e sita ku minister Ruisandro Cijntje i Ramon Chong, a pidimi pa hasi un petishon por eskrito i a primintí ku dentro di dos siman lo bini un reakshon riba e petishon”, Van Os ta bisa.

A entregá e petishon riba 5 di yanüari di e aña aki, pero apesar di tur meil i yamadanan telefóniko kaminda a hasi promesanan konkreto ku nan lo a yama e dia ei mes bèk, Van Os no a tende nada te ku dia di awe. 

Paro di keho

Fundashon Interes di Konsumidó na Kòrsou ta purba na tur manera pa evitá un paro di keho. Segun Van Os konsumidó tin derechi riba un tratamentu rápido di su keho.

Pa aliviá e trabou e fundashon lo no ta alkansabel telefónikamente riba djabièrnè pa por hasi e proseso di rekuperashon riba e dia ei.

Boluntario. 

Un òf dos boluntario ku lo ke yuda un par di dia tambe lo ta un bon solushon. “Nos preferensia ta bai pa boluntario ku por papia Papiamentu sin problema, pero kada ayudo ta bonbiní”, segun Van Os.