WILLEMSTAD – Aña pasá tabatin 10.261 insidente di tráfiko na Kòrsou ku daño material, kaminda 18.782 outo tabata embolbí. Den kasi 95 porshento di e kasonan aki tabata trata di un aksidente. Esei ta sali na kla for di sifranan anual di Forensys, ku ta registrá notifikashon di daño na enkargo di  kompanianan di seguro.

Ku 88.639 vehíkulo sigurá riba kaminda esaki ta nifiká ku kasi djesun porshento di tur outo sigurá, un riba djes pues, tabata embolbí den un òf mas aksidente aña pasá.

Mayoria kousante di e aksidentenan tabata hende hòmber ku kasi sesenta porshento. E kategoria di edat entre 26 i 35 aña di tantu hende hòmber komo hende muhé huntu a kousa mas tantu aksidente.

Mayoria aksidente ta sosodé den lunanan di novèmber i dezèmber, i den luna di dezèmber mas ku djes porshento.

Na 1591 aksidente mester a pidi asistensia di ambulans pasobra tabatin herido. E kantidat di aksidente ku herido ta kasi méskos tur luna. Aña pasá tabatin 25 morto den tráfiko.

Un riba djes aksidente tin un òf mas outo embolbí ku stür na man drechi. Den mas ku mitar di e aksidentenan e shofùr ku su stür na man drechi tabata responsabel pa e aksidente.

Mas ku nuebe porshento di e shofùrnan ku tabata embolbí den un aksidente, a kore bai despues di e aksidente. Un riba kada djes pues i spesialmente den luna di dezèmber ora ku a registrá mas aksidente. No ta straño ku den 82 porshento di e aksidentnan ei esun ku a kore bai tabatin falta, segun Forensys.

Caracasbaaiweg ta pará na number un ku 358 aksidente, siguí pa Schottegatweg ku 290 aksidente i Winston Churchillweg ku 258.