KRALENDIJK – Unkobon kier kuminsá pa gradisí tur hende ku a yuda finansieramente pa hasi e kaso hudisal aki posibel. For di nos promé yamada, dos luna pasá, nos a risibí mas o menos $ 70.000,–. Esaki ta fantástiko.

E meta ta sinembargo pa yega $ 150.000,00. Pa logra esaki nos mester yudansa di mas hende ku kier kontribuí ku un montante chikí òf grandi. Por transferí e donashon riba kuenta nr 400356702 di Union di Konsumidó Boneiru, Kaya Korona 30,  na MCB Bonaire menshonando bo “e-mail adres” i “kaso hudisial”. Nos lo ta kontentu ku un donashon chikí òf grandi i ta konta ku bo aporte.

Resientemente den un reunion di Tweede Kamer preguntanan a keda lansá tokante e falta di un minimo soshal digno pa habitantenan di e islanan BES. E partido polítiko Partij voor de Dieren a entregá un moshon pa introdusí un minimo soshal ekivalente na esun di Hulanda pa habitantenan di e islanan BES.

Un investigashon hasí resientemente pa e Nationale Ombudsman atrobe a ilustrá ku no tin motibu sostenibel pa keda nenga nos poblashon un minimo soshal hustu. Komo tal Unkobon ta spera ku dia bai trata e presupuesto di Binnenlandse Zaken, pasonan supstanshal lo bai wòrdu tumá por fin. E tratamentu di e presupuesto lo bai tuma lugá despues di e reseso di verano. Unkobon lo probechá pa hasi algun trabou preparatorio nesesario durante e reseso aki.

Djarason, 6-7-2022, NRC Handelsblad a publiká e notisia di e kaso hudisial ku ta pendiente. E eksortashon mientras tantu a wòrdu mandá pa e minister konserní na Den Haag. Estado Hulandes lo tin seis siman tempu pa reakshoná riba nos eksigensia. Si esaki no ta e kaso òf e komentario no ta satisfaktorio, lo sigui emplasamentu. Unkobon ta desidido pa hasi tur kos ku ta na su alkanse pa eliminá e abuso aki. Nos habitantenan meresé, igual ku esnan na Hulanda, un minimo soshal digno i disente. Via e “link” aki bo por lesa loke NRC Handelsblad a publiká tokante e intenshon di Unkobon i tambe e promé reakshonnan tokante e kaso hudisial pendiente.

Unkobon lo tenébo informá di e siguiente akshonnan. Si tin pregunta bo por dirihí esaki naturalmente na Unkobon.

Un biaha mas: “ si bo por aportá na e kaso aki Unkobon lo apresiá bo sosten”.