ORANJESTAD – Diabierna 14 di april den oranan di madruga Wardacosta den bon colaboracion cu Cuerpo Policial Aruba ta intercepta un boto cu a purba drenta Aruba den e parti Nord.

Despues di un persecucion caminda mester a los tiro di advertencia y tiro dirigi riba e motornan di e boto pa Wardacosta por a logra para e boto. Durante e persecucion e personanan abordo di e boto sospechoso a tira paketenan den lama. Wardacosta a logra detene 9 persona abordo di e boto sospechoso cu tawatin intencion di drenta Aruba. Despues di un busceda riba lama cu e avion Dash, e helicopter y un Metal Shark di Wardacosta a bin encontra un cantidad substancial di paketenan conteniendo marihuana.

Diabierna 21 di april un biaha mas, panord di Aruba, Wardaosta un biaha mas den bon colaboracion cu Cuerpo Policial Aruba ta intercepta un otro boto cu 9 persona abordo cu a intenta di drenta Aruba na un manera clandestino. Den tur dos e casonan e personanan ta procedente di Venezuela. E dos casonan a ser hasi den bon coperacion cu Cuerpo Policial Aruba. E personanan y e droga a ser entrega na KPA.