WILLEMSTAD – Riba djamars Wardakosta a enkontrá un boto ku tabata mustra un komportashon kuestionabel. 

A disidí pa manda unidatnan di un ‘Metal Shark’ i tambe e helikòpter di Wardakosta pa investigá e boto. E boto tabata nabegá entre Klein Kòrsou i Kòrsou. Na momento ku a topa ku e nabegante di un boto tipo ‘yola’, a tuma e desishon di bin kuné na base, pa asina kontrolá e boto. Inisialmente, durante di e kontrol, a topa ku diferente piska a bordo. 

A disidí di sigui kontrolá i a tuma nota di diferente pakete sospechoso, ku a resultá den un total di mas o menos 218 kilo di kokaina. A detené e kapitan (hende hòmber lokal) i huntu ku e paketenan, a entrega esaki na Kuerpo Polisial. Tur droga a ser destruí. Pa loke ta trata e boto, esaki a ser konfiská.