WILLEMSTAD – Wardakosta a skapa djadumingu ku a pasa dos piskadó for di laman. Nan boto tabata pasa awa i a senk bai fondo.

Promé ku e boto a senk, pero ku ya e awa tabata te na su rudia, e kapitan a sa di hasi kontakto ku e Sentro di Operashon Marítimo di Wardakosta.

Mésora a manda un helikòpter for di e punto di sosten di Wardakosta na Hato pa duna asistensia na e nabegantenan. Un otro boto di piskadó tambe a bai na e sitio ku a indiká i a purba di yuda e barku den peliger mediante un pòmp di awa.

Pero  esei no a duna resultado. E boto tabata asina leu kaba bou di awa ku no por a skap’é. A hisa e dos nabegantenan na tempu den e helikòpter i a hiba nan sano i salvo Hato.