‘Mi ta pone tur mi kartanan riba e generashon mas hóben’

E Podcast WeConnect di e luna aki ta trata di Kjelld Kroon i su aktivismo di klima pa protekshon di Boneiru. E Boneriano Kjelld ta forma parti di e kaso den korte di Greenpeace kontra gobièrnu Hulandes. Di e manera aki e ke pone e konsekuensianan desigual di kambionan di klima pa Boneiru riba mapa. Hóbennan tin un bos importante den esaki, e ta haña.

Kolonialismo

Kjelld (29 aña) ta biba i traha komo produktor di programa na Amsterdam. El a studia filosofia ku atenshon pa e ròl di dekolonisashon. E echo ku Boneiru ta un eks-kolonia di Hulanda ta hunga un papel importante kon Hulanda ta trata e krísis di klima na Boneiru, segun Kjelld. Tin falta di boluntat i un sierto falta di interes pa kompensá Boneiru na un manera hustu pa e daño ku ta surgí a konsekuensia di e kambionan di klima, e aktivista di klima ta konstatá: “Den pasado a hasi nos asina hopi daño riba tereno finansiero, emoshonal i ekológiko. Pone en todo kaso e sèn aki abou pa klima.”

Embolbimento lokal 

Riba e isla mes habitantenan ta ripará si ku ta birando mas kalor òf ku e playanan ta kambia òf ku sierto matanan no ta krese mas. Pero pone un relashon dirèkt ku e krísis di klima no ta bai di mes. Hiba kampaña na Boneiru mes ta enteramente otro ku na Hulanda, Kjelld ta splika: “Nos ta hiba kòmbersashonnan bou di palu enbes di kampañana digital riba media sosial. Protesta nos ta hinka den un bachi di kanto i baile.” Asina bo ta haña e hendenan ta partisipá i e respaldo ei bo mester, e ta splika.

Hóbennan 

Kjelld ta hasi un yamada riba tur hóben pa informá nan mes i asina embolbí nan mes den akshonnan di klima i otro tópiko ku nan ta para p’e riba e islanan. “Mi ta pone tur mi kartanan riba e hóbennan, tin asina hopi talento.” E ta mustra riba e karákter nashonal i edukashon na Boneiru kaminda konseptonan manera ‘pueblo humilde’ ta asta mentá den e himno nashonal. “Tin biaha hendenan ta pasa riba bo si bo ta muchu humilde. Sá kiko bo derechonan ta i riska ekspresá bo mes.”

Christopher Willemse ta presentá e WeConnect Podcast aki i por skuch’é via: