WILLEMSTAD – E echo ku Banko Sentral a hala Pèrmit di Banko di ACU aden djamars ku a pasa tabata hustifiká. Esaki korte a dikta den e huisio sumario ku e institushon di krédito koperativa pa ámtenarnan di Kòrsou a entamá djamars ku a pasa.

Serka ACU tabatin un kultura di sírkula miembronan di direktiva, pues ta nombra miembronan ku sali for di un òrgano den un otro órgano. Pues supervishon i direktiva tabata konsistí di hendenan ku kada biaha di nobo tabata kambia posishon, segun Banko Sentral.

Segun e supervisor e struktura aktual di governance di ACU no ta sirbi ku konsekuensia ku restrukturashon ta di sumo importansia pa kontinuidat di ACU i tambe un kondishon pa e mantené su pèrmit.

Den e reunion general di miembronan di 10 di yüli sinembargo no a aprobá e dokumentashon di restrukturashon ku Banko Sentral a haña asina nesesario, ku komo konsekuensia ku e rekursonan normal pa ehekuta e dokumentashon di restrukturashon ta agotá. Pesei Banko Sentral no a mira niun otro opshon ku hala e Pèrmit di Banko aden i laga korte dikta un areglo di emergensia di nobo.

Segun ACU no tin niun motibu pa intervení ku un areglo di emergensia. E direktiva ta enfatisá ku e situashon finansiero di ACU ta bon i ku Reunion general di Miembronan ta apto pa tuma desishon. E medida ta desproporshonal segun ACU.

Segun korte ta konosí ku pa basta tempu kaba ACU no por a yega na un restrukturashon manera Banko Sentral a determiná. Esei kaba ta un indikashon serio ku e organisashon di goberná interno di ACU, e governance, no ta reglá i ku a konsekuensia di esaki e interes di kasi 26.000 miembro/doñonan di kuenta ta na peliger.

E echo ku interferensia i instrukshon kontinuo di Banko Sentral pa yega na un restrukturashon no a surti e efekto deseá ainda, ta suprayá esei mas aun. E Banko tabatin e pleno derecho pa intervení, pasobra interes di akreditornan huntu ta hasi esei nesesario.